一個係震古鑠今嘅功夫巨星，將中華武術推廣到全世界；另一個係「不男不女」嘅武術界新丁，因為功夫，令佢經歷種種奇遇，炮製連串笑料。兩者看似風馬牛不相及，但係喺SHF嘅串連之下，玩具迷大可上演一場另類格鬥—李小龍VS早乙女亂馬，Ready？Fight！

龍哥唔只表情多多，喺戲中仲有唔少招牌手勢，SHF版本亦都做到足。

關節可動性相當高，起腳甫士冇難度。

膊頭關節咁樣設計，擺明犧牲造型美去遷就可動性。

鞋底設計竟然咁有心機，一定要加分！

有人話呢款表情似八両金，其實係唔係倒果為因？八両金擺到明係炒龍哥多啲喎！

由武器Parts到赤膊造型，呢款SHF Bruce Lee都似足《龍爭虎鬥》嘅造型，可惜面上與胸口少咗血漬，唔通Bandai收埋做後着，遲啲會打正《龍爭虎鬥》嘅旗號出特別版？

SHF Bruce Lee
建議零售價：¥5,500

喺故事初段，亂馬對自己嘅女生體形極度唔自在，因而搞出唔少笑料。

隨盒附有唔少款式嘅造型手掌，包括呢款高橋留美子筆下嘅招牌敗陣手勢。

變成女生嘅亂馬依然功夫了得，隨盒就有長棍及柳葉刀，展示「無差別格鬥」武者嘅神勇一面。

唔只有專屬地台，仲有形聲詞布景板，加強Figure嘅動漫氣息。

SHF 早乙女亂馬
建議零售價：¥4,800

1:6嘅李小龍Action Figure，早就有香港單位推出過，估唔到係一向出開「拉打」幪面超人嘅SHF系列，近年來大膽走出框框，繼Super Hero角色後，早前仲打龍哥主意推出「Bruce Lee」。上網一睇，唔知好嬲定好笑，發現唔少玩具迷惡搞呢款龍哥Figure，仲影埋相Post上網，尤其是其中一款招牌式嚎叫嘅面相表情，有人話似八両金，成為惡搞嘅熱門對象。就當我老土又冇幽默感，龍哥係要嚟尊重，唔係褻玩，我呢篇稿只會正正經經分析Figure嘅設計優劣，惡搞嘅嘢，Sorry，本文欠奉。

赤膊龍哥 可動性佔優

唔只Bandai，真心講，其他日系單位出真人Figure，面相神似度都未能令人滿意（呢方面香港品牌真係值得自豪），SHF嘅Bruce Lee又如何？實話實說，當然唔可以同主流嘅1:6相比，如此比較亦都唔公平，因為SHF龍哥細隻好多，高度只有140mm左右，故此以貨論貨，其實已經有交代（與同系嘅Thor比較，你一定Buy我咁講），最起碼一眼就會認出係李小龍，而唔係大小相近，但係見到實物會想問句「先生貴姓」嘅figma版本。至於「八両金」嘅表情Parts，筆者都覺得有啲過咗火位，但係睇番正經Look與嘟嘴Look，就會發現都算神似，而且小小嘅Boxset已經有四款面相組件，表情變化多過1:6。至於可動性方面，維持SHF一向嘅高水準，不過整體設計沿用同系拉打嘅分割模式，並非1:6嘅包膠素體加外置衫褲，尤其是今次用咗赤膊造型，故此關節突兀在所難免，猶幸武器多多補番條數，除咗招牌式嘅雙節棍，仲有《龍爭虎鬥》用過嘅長、短棍。總括而言，1:6李小龍勝在像真度高，唯美取勝，而SHF版本就憑高可動性及豐富組件，喺可玩性方面佔優，當然價錢上容易入手得多。

女亂馬打頭陣 嬌俏可人

憑功夫打出名堂嘅，仲有《亂馬1/2》嘅早乙女亂馬，不過路數唔再係硬橋硬馬，變成諧趣，甚至無厘頭。身為「無差別格鬥」嘅第二代繼承人，亂馬最令人有印象嘅，並唔係佢嘅必殺技「火中天津甘粟拳」，而係畀凍水淋就會變成女生嘅雌雄莫辨，今次嘅SHF就先推出亂馬女生版本（第二款SHF《亂馬1/2》Figure將於六月推出，角色就係對亂馬又愛又恨嘅珊璞）。即使女生Figure嘅手手腳腳都會纖幼得多，但係呢款SHF亂馬依然保持高度可動性，襯埋隨盒附上嘅造型手掌，加埋長棍、柳葉刀，忠實還原亂馬嘅功夫底子。至於苗條身段，加埋似足動畫人設嘅四款表情組件，相信可以勾起唔少動漫迷嘅童年回憶（想當年係亞視播亂馬，仲要加「PG家長指引」，可惜依家亞視都……），日系廠商做番日系動漫嘅Figure面相，寧舍捉到神韻。將龍哥同亂馬扯埋嚟講太無厘頭？1996年嘅《Space Jam》，Michael Jordan都可以同賓尼兔做對手戲啦，可惜嘅係龍哥已經仙遊，冇辦法同動漫界Crossover拍番套東方版《Space Jam》，玩具迷惟有從SHF入手圓夢。

查詢︰2433 1828（瑞華行）

文︰Dick

攝︰Paul、Ho Man