重火力新Look HT 1:1 Batmobile

作為男生，有邊個唔鍾意車？數Dream Car，法拉利、林寶堅尼、保時捷等固然係熱門之選，不過對動漫迷嚟講，相信另有終極答案，就係「蝙蝠車」，可惜香港又有幾多粉絲有能力又有熱誠做到蝙蝠車車主？即使未能擁有，畀我睇睇實物都於願足矣，由Hot Toys與又一城合辦嘅電影主題展覽中，HT就炮製咗1:1嘅全新Batmobile模型做參展主角，作為動漫控兼車迷嘅你我他，有理由唔去朝聖咩？

新版Batmobile係唔係最靚就見仁見智，不過見到車頭嘅一對雙聯裝火炮，就知火力一定最強！

由HT製作嘅1:1 Batmobile模型，唔只尺寸、輪廓都跟足電影設計，連細節到塗裝都係嘔心瀝血之作。話時話，筆者覺得新Batmobile就似一部重裝甲嘅Dune Buggy。

唔只1:6，同場仲有1:1嘅三位主角雕像，當中最令人驚喜嘅，一定係仙氣度超高嘅Wonder Woman。

睇Trailer、劇照都未夠清楚？場內就有多個1:6嘅情景組合，將當中嘅有型場面實體化。

既係名導，又係Figure界紅人嘅郭子健都一早入場朝聖，佢又有乜講︰「最震撼梗係架蝙蝠車啦！套戲都未必有全相睇，依家成架擺喺你面前，唔係唔睇清楚呀！」

Armored Batman（Black Chrome Version）預訂價$1,780（即日至本月9日於場內接受預訂）

唔只展品吸引，就連場區布置都冇得輸，從上層俯視落去，點到你唔O嘴？

Armored Batman Batman Cosbaby $138/個
（左至右）Matte Black Version、Chrome Version with LED、Black Chrome Version with LED

新版造型實戰感高

Batmobile就同主人Batman一樣，咁多年嚟衍生出多個版本，據聞全新嘅Batmobile集合咗經典型號嘅修長造型，以及之前《The Dark Knight》系列嘅重甲特色。今次HT就同DC Comics合作，有充足嘅電影資料做Back Up之下，以1:1嘅形式出盡全力還原出嚟，首先尺寸上就跟足電影設計，車身長20呎、闊10呎，台型十足，最引人注視嘅當然係車頭嘅雙聯裝重炮，正正係新Batmobile嘅設計特色，因為以前嘅Batmobile就算有武器，都會收收埋埋，發射時先會打開，但係新版本就無遮無掩擺正喺車頭中間，霸氣盡現。除此之外，HT版本唔只全車大小與車身輪廓都跟足實物，就連每條喉管以至螺絲位都忠實還原，加埋具層次嘅舊化塗裝，淨係計外形，同拍戲所用嘅道具有分別嗎？

真人原大Wonder Woman 仙氣逼人

今次嘅展覽主題，係即將於月底上畫嘅《蝙蝠俠對超人︰正義曙光》，又點可以畀Batman威晒？場內唔只Show咗HT最新發表嘅Superman及Batman 1:6 Figure，仲有唔少情景組合，將電影中嘅雙雄對決大場面，以1:6實體化形式預先「公映」。唔只1:6，HT仲專誠為今次活動炮製咗Batman、Superman及Wonder Woman嘅1:1雕像，造型跟足電影版本外，塗裝方面仲由大師JC Hong負責，當中最令筆者「中毒」嘅，係Wonder Woman唔只五官挺拔，皮膚仲做到白裏透紅，頭髮仲用埋植髮製作，寧舍飄逸，如此「神女」仙氣十足，唔只男生，相信女生行過都會望多兩眼，如果畀專家Dickson見到嘅話，會唔會貪新忘舊唔要小莉呢？

活動小資料

名稱︰《蝙蝠俠對超人︰正義曙光》×又一城 powered by Hot Toys展覽

地點︰又一城LG2、G及UG層

日期︰即日至4月10日

時間︰10:00am-11:00pm

溫馨提示︰上齊銀彈

雖然Batmobile與Wonder Woman只可以睇，唔可以帶走，不過一場嚟到又點可以冇戰利品返歸？HT唔只同潮牌:CHOCOOLATE合作，安排咗Armored Batman（Black Chrome Version）喺場內率先收訂，仲同場開咗Pop Up Store，備有Cosbaby Q版Figure、人形咕（口臣）、布公仔及童裝風褸等別注精品開售，而且買滿$300或以上，仲可以參加互動遊戲贏禮物，故此唔只Batmobile要上齊子彈，Fans入場前更要帶夠銀彈！