操控贏盡民心Jaguar XF 25T R-Sport

積架（Jaguar）推出第一代XF，已經係2007年嘅事，接棒嘅新一代就啱啱抵港，驟眼看，外觀變化唔大，你問我過去10年香港變咗啲乜可能仲清楚，好似多咗大白象基建、少咗中華白海豚……其實肯用心睇真啲，新XF有唔少改動位，尤其係車身結構、性能配套以至車廂布局，並非單純夠期換款嘅「二代目」，對於駕駛過第一代型號嘅車迷而言，更會大條道理貪新忘舊。

Jaguar XF 25T R-Sport

R-Sport配置18吋輪圈，尺寸恰到好處。

頭燈組整合咗家族式設計嘅J-Blada LED日間行車燈，分外易認。

鬼面罩用咗網紋款式，展現硬朗形象。

尾喉用咗左右雙出式布局，運動風格不言而喻。

行李箱深度增加咗61mm，可以同時放置兩個高爾夫球桿袋。

新XF喺外觀上嘅改動唔算天翻地覆，依然秉承大方得體又不乏好動一面嘅美學傳統。

新XF配備InControl Touch資訊娛樂系統，還有藍芽功能。而車廂布局一貫積架嘅英式風格，高級皮革處處皆見。

中控台裝有八吋觸控式顯示幕，而且接駁咗泊車鏡頭。

後排空間相當寬敞，Leg-room位置最為明顯。

後排側窗設有遮光簾，藉此營造私隱環境。

電動天窗可以前後滑動或揭起。

引擎低扭輸出強勁，起步反應相當爽快。

外觀變得少係好定唔好？睇你點諗啦，不過代理話咁先保留到XF神髓，容易認。無論你Buy唔Buy呢個講法，新XF嘅賣相依然入型入格，加埋家族式設計嘅J-Blada LED日間行車燈及R-Sport套件，顯得與別不同。事實上，廠方用咗「This is not business as usual」作為新XF嘅宣傳口號，去年三月喺倫敦舉行首展禮時，就安排新XF喺金絲雀碼頭（Canary Wharf）水域上、離水平面18m嘅半空之中，以走鋼線方式出場，太浮誇？廠方解釋係要帶出大膽革新嘅品牌精神，以及展示新XF嘅極致操控能力。

扭力轉換攻彎更順

新XF係品牌第二款採用高密度鋁質單體殼式車身結構嘅型號，鋁材比例高達75%，令車架減重190kg，剛性就升咗28%，喺Euro NCAP撞擊測試中獲得最高級別嘅五星評級，輕盈、堅固又安全，為操控表現打好根基。率先輸港嘅新XF有三個版本，分別係XF 25T Prestige、XF 25T R-Sport及XF 35T R-Sport，兩款25T都用2.0L直四Turbo，35T就搭載3.0L V6 Supercharge，兩副引擎嘅馬力分別為240ps及340ps，而八前速自動波屬於標準配置。今次測試嘅XF 25T R-Sport嘅標準裝備包括運動化包圍，以及R-Sport懸掛、尾擾流、10段方向調校皮椅、多功能Softgrain真皮軚環及18吋Helix輪圈等，造型比Prestige少咗穩重、多咗跑味，設備亦更為齊全。

至於新XF嘅底盤設定，帶嚟高度舒適性，又有出色嘅操控性能，就算懸掛冇F-Type咁進取，依然可以抑制到攻彎時嘅重心轉移。同時，原廠為新XF安排咗Torque Vectoring by Braking，屬於一款煞車控制扭力轉換系統，原理係透過對個別車輪施加制動，提升轉向流暢度，以及減少「推頭」現象，舉例嚟講，轉右彎時，系統會根據車速及轉向角度等資料，按需要對右邊車輪施加適當力度嘅煞車，令左邊車輪有相對較高嘅轉速，就算呢種制動力通常都好輕微，駕駛時唔多感覺得到，不過有效提升攻彎時嘅貼服感及穩定性，加上接近50：50嘅前後車重比例，令新XF擁有絕佳嘅操控平衡，駕駛感覺好似Coupe。

低速巡航無懼冰面

比起上一代，新XF嘅軸距長咗51mm，乘客當然受惠，後排Leg-room夠晒寬敞，身高5呎10吋嘅攝影師試坐，膝頭與前排椅背仲有明顯空位，而前排位置亦屬合理水平，未有刻意推前營造後排闊落嘅假象。為咗提升安全表現，新XF配備All Surface Progress Control功能，可以理解為低速巡航系統，只要車速喺30km/h以下，系統可以精準地自動控制動力與制動系統，就算走喺濕滑結冰嘅路面上，都發揮到極佳嘅牽引效果，避免輪胎打滑，再遇數十年一遇嘅路面結冰都冇有怕。