相信大部分本地用家都同筆者一樣，揀MPV有兩大條件，其一要係日系型號，皆因選擇多，而且車廂配套比歐洲品牌實際得多；其二係引擎容積要喺2.0L或以上，否則滿載上斜都會心驚驚。不過隨住福特（Ford）Grand C-Max到港，毋須再堅持以上考慮，車廂設計唔再離地之餘，就算係1.5L直四引擎，但係馬力多達150ps，仲使驚？

車廂布局唔玩花巧，實用主調先至Fit到MPV用家嘅真正需要。

雙圈式儀錶板設有遮光罩，中間又有輔助屏幕，不過屏幕資訊相當多，閱讀時確需時間消化。

天窗面積覆蓋晒前、中兩排座椅，開揚度令人滿意。

中控台嘅八吋屏幕唔只有觸控式功能，仲可以對應後泊鏡頭。

透過FFS設計，可以輕易收起中排中間座椅，騰出通道直達後排。

睇真啲，鬼面罩設計都幾似同廠Fiesta，夠晒Young Look。

拉一拉手柄就可以收起後排，輕鬆增加置物量。

雖然話外觀未算有驚喜，不過整體造型亦未至老土，加上車身顏色有12種選擇，已經夠交代有餘。

1.5L EcoBoost Turbo引擎馬力充足又慳油，全面取悅香港用家。

實用配套有驚喜

論車廂配套，日系MPV一向以裝備多、設計細心見稱，與之相比，歐洲車款就顯得豪氣有餘而實用度不足，不過Grand C-Max就係例外。首先，Grand C-Max嘅銷售對象係一般家庭用戶，故此設計唔再離地、花巧，實用才是王道，中排座椅備有FFS（Fold Flat System）功能，只需三個簡單步驟，就可以收起中間座椅，騰出通道方便後排乘客進出；中控台就有SYNC II多媒體控制介面連同八吋觸控式屏幕，對應冷氣、音響及免提電話等多項裝置。車尾方面，唔只有特大置物空間，而且輕拉手柄就可收起後排，藉此增加置物量，過年前行花市，筆者試過載桃花都夠位擺。另一方面，雖然雙趟門唔係新鮮事，但以往多數用於2.0L或以上嘅日系MPV身上，如今「Made in Germany」嘅Grand C-Max亦都用到，加埋低地台，長者或小朋友進出車廂都方便得多，體貼度大大加分。

1.5L Turbo有心有力

Grand C-Max嘅引擎容積只有1.5L，何以有150ps馬力？皆因呢副偈唔係NA，係EcoBoost Turbo類型，所以連扭力都標青過人，高達24.5kgm，而且早於1,600rpm已經全數到位，燈位起步與上斜都有心有力。就以今次試車為例，喺大埔新娘潭一帶嘅山路進行，起步表現爽快，慢車後重新起步亦都反應直接，當然，六前速Select Shift自動波亦應記一功。既然係家庭車，實用、夠力之餘，低耗油都好重要，Grand C-Max嘅引擎設有自動熄火系統，停車等候時，引擎會自動熄火，減少不必要嘅耗油量，廠方公布嘅平均耗油量只有15.1km/L。至於賣相方面，平心而論未算驚喜，但係當你知道慳油表現咁標青，而車價只係$239,900起，個樣夠唔夠惡、有冇跑化包圍，對真正嘅MPV用家而言，又有幾重要呢？

SPEC

車　　　型：五門七座位MPV

引　　　擎：直四EcoBoost Turbo

容　　　積：1,498c.c.

最大馬力：150ps/6,000rpm

最大扭力：24.5kgm/1,600-4,000rpm

驅　　　動：前置引擎、前輪驅動

傳　　　動：六前速Select Shift自動波

懸　　　掛：（前）麥花臣、（後）多連桿

制　　　動：（前）通風碟、（後）實心碟

車身體積：4,519×1,828×1,662mm（長×闊×高）

平均耗油量：15.1km/L

售　　　價：$239,900起

查　　　詢：2820 4018（Future Motors）

文：Samuel　攝：Chris