平玩入門孖寶　Nikon Coolpix A100 & A10

想當年DC仔市場百花齊放，但自從智能手機愈來愈影得，就令入門級DC買少見少。點知你又估Nikon唔到，近期竟然推出入門機仔，仲要打孖上，分別係Coolpix A100及A10，最大賣點是超抵玩，唔使打爆豬仔錢罌就買到，畀小朋友、老人家用就至啱。

兩機同樣具有一支五倍變焦鏡頭，並提供26mm廣角端。
A100　$1,140
A10　$830

A100的機身厚度只有19.8mm，大概跟一元硬幣的直徑相若。

A100支援最高ISO 3,200感光度，於室內或夜間拍攝都無難度。

A10用兩粒AA電池驅動，去旅行時隨處都買到，毋須擔心電源問題。

A10提供六種前期的特殊效果，當中鏡像就好似照鏡般玩左右對稱。

A10後製的快速效果有十種之多，能夠玩出個性化的作品。

A100試相：使用普普風拍攝效果，提高飽和度令色彩濃烈，而且畫質銳利度高，樹葉和石山上的細節盡現。

A10試相：利用鏡像效果，左右對稱的畫面相當有趣，加上近拍能力尚算出眾，微距拍攝都兼顧得到。

五倍變焦鏡頭

A100和A10同樣配備了一支五倍變焦鏡頭，提供26mm~130mm焦段，這種焦段足夠拍攝一般生活照，當中A100更支援10倍Dynamic Fine Zoom，但小記覺得此變焦倍率太少，未必可滿足遠攝的要求。兩機還具備電子減震功能，自動提升感光度來避免手震，雖然實際使用總不及光學防震，不過有雜訊總比手震好。此外，A100和A10都擁有720p的拍片、2.7吋23萬像素屏幕等配置。

A100纖薄機身

既然A100賣貴幾百蚊，規格上固然會勁少少。機身就有銀、黑、紫及紅四種顏色選擇，厚度僅19.8mm，可以袋入衫袋或褲袋。A100內置2,010萬像素CCD，提供最高ISO 3,200感光度，即使在昏暗的環境都應付得到，而且相機操作簡易，提供自動模式、智能人像、自動場景模式等，還有多種對焦模式可以選擇，例如臉部優先、主體追蹤等等，備有較多的手動設定。

A10採用AA電池

A10則備有黑、銀兩色機身選擇，驟眼看比較笨重，亦因為手柄略厚，所以握持的手感的確好少少，加上它採用AA電池，換言之出門旅行連火牛都唔使帶。A10配備1,610萬像素CCD，也提供多款好玩的濾鏡特效，包括懷舊棕褐色、普普風、鏡像等六種前期的特殊效果，影完相加工亦有十種快速效果，就算新手都影到獨特的作品。