手機電量續航力係用家關注重點之一，近年一眾廠商都不斷加大內置電池容量，不過針冇兩頭利，大電池無可避免延長咗充電時間，最快都要三幾個鐘先叉得滿。幸好，近期Android手機紛紛支援快速充電功能，甚至標榜只需十幾分鐘就可以瞬間補電，想知實際係咪真係充得咁快？手上部電話又用唔用到？即睇！

小測試

大部分Samsung手機，好似Galaxy S6、Note 5、A9等中高階手機都係跟呢款Adaptive Fast Charging火牛，最高輸出達9V/1.67A。廠方表示，手機只需充電10分鐘，即可有4小時電量，不過使用習慣人人不同，較難作準。

HTC用家可以畀$338另購快叉火牛，輸出為5V/1.67A、9V/1.67A、12V/1.25A，USB插口位置會印有閃電圖案以資識別。

Moto G Turbo跟機係Turbo Power火牛，廠方以用量作為單位，15分鐘可充到能夠供6小時使用嘅電量。

比起傳統充電以及Quick Charge 1.0，Quick Charge 2.0充電效率有大幅提升。

一般手機即使正在使用快充功能亦未會顯示，而Samsung部分手機則會於狀態欄顯示充電狀況，有冇快咗一目瞭然。

不單止高階機支援快叉，就連走入門及中階路線嘅ZenFone 2都一樣用到快叉。

Samsung原廠快速無線充電板，Galaxy S6 edge+、Note 5及其後推出嘅手機可支援呢項功能，充滿電後就會着起綠燈，非常有型！ $348（a）

Samsung另有這款內置5,200mAh嘅電池，其充電規格與Adaptive Fast Charging相同，裝置充電10分鐘即可使用長達4小時。$448（a）

MiniQ Charging Station 5Q提供五個USB插口，每組USB插口可支援5V/2.4A的電流輸出。其中一個插口具備Qualcomm Quick Charge 2.0認證。 $498（b）

XPower WC3QT QC2.0 Travel Charger支援兩組5V/2.4A及一組5V/1.7A、9V/2A或12V/1.25A Quick Charge 2.0插口，並提供四款插頭，方便外遊。$278（c）

XPower CC4Q 4-Port USB QC2.0 Car Charge係供汽車使用，支援9V/2A、12V/1.5A電流輸出，備有四組USB插口，一次過充四部手機都冇問題。 $198（c）

Quick Charge 3.0配件已經就緒，好似呢款Aukey已經可以喺Amazon網購。

早前CES 2016發布嘅LeMax Pro能支援Quick Charge 3.0技術，不過尚未有推出時間表。而HTC One A9亦支援此新技術，只要日後更新軟件，再配合專用火牛就得喇！

Quick Charge 3.0充電35分鐘已經可以將電量充至80%，速度快捷。

Quick Charge 3.0將可以支援Snapdragon 820、620、618、617及430處理器，全屬新一代晶片。

國產品牌OPPO有「VOOC閃充」快充技術，30分鐘即可將3,000mAh電池充至75%。

快充兩大板斧

1. 處理器支援

所謂快速充電，係一個相對概念，就係比傳統充電時間快。要用到快速充電，最重要係視乎手機處理器支唔支援。坊間絕大部分手機都採用嘅Qualcomm同埋MediaTek處理器，都有自家快速充電功能，前者稱為Quick Charge，後者就叫Pump Express。以較普及嘅Qualcomm Quick Charge為例，分別有1.0、2.0版本，當中以2.0最為常見，支援Qualcomm旗下Snapdragon 200、400、410、615、800、801、805，亦係市場上大多手機型號採用嘅處理器。根據廠方數據，透過Quick Charge 2.0技術，為3,300mAh電池充電30分鐘，可以將電量由0%充至60%；而電流輸出為5V/1A的傳統充電器就僅可充到12%，足見充電速度明顯提升，只需極短時間已經可以將手機電量充至一定程度。

2. 火牛高輸出

Quick Charge另一重點就在於俗稱火牛嘅電源轉換器。傳統火牛一般為5V/1A或2A，電流輸出最高只有10W。Quick Charge技術就支援高達5V、9V、12V/3A，理論上電流輸出可以高達36W，輸出夠大，當然可以加快充電時間。雖然同樣支援Quick Charge功能，但各大手機品牌都會再改良一下技術，並會冠上其他名堂，例如HTC Rapid Charger、Motorola Turbo Power、Samsung Adaptive Fast Charging等等，大家選購火牛、配件一定要留意。另外，亦建議最好選用原裝USB線，否則有可能因為線材質素及兼容性而影響快充表現。

充電效率睇真啲

近期唔少熱門手機都會支援快速充電，小記就搵咗三部標明支援嘅新機，包括Samsung Galaxy A9、HTC One A9以及Motorola Moto G Turbo，睇吓係咪充電如此有效率。Galaxy A9跟機火牛輸出為5V/2A、9V/1.67A；One A9跟機火牛只係傳統「慢叉」，但用家可另購快叉火牛，其輸出為5V/1.67A、9V/1.67A、12V/1.25A；Moto G Turbo跟機火牛輸出為5V/1.6A、9V/1.6A、12V/1.2A。小記做咗個小測試，三部手機都用原廠火牛同埋USB線，喺熄機情況下充電15分鐘，Galaxy A9、One A9及Moto G Turbo分別充到21%、24%及25%。充電1小時之後，Galaxy A9電量充至63%，One A9充到64%，Moto G Turbo電量就有81%。雖然未如廠方數據指30分鐘充60%咁犀利，但短短時間已經可以將手機電量充至超過一半，兩粒鐘內即可將電池「打滿」，充電效率都算高。

有咩手機用得到？

據Qualcomm資料顯示，大部分大廠出品，如HTC One M9、LG V10、LG G4、BlackBerry Priv、Sony Xperia Z5、Asus ZenFone 2、Samsung Galaxy Note 5、Galaxy S6、小米手機4等手機都支援Quick Charge功能，不過要留意，部分如HTC、Sony等廠商跟機時只有傳統而非快充火牛，用家要另購快充火牛先用到。

極速充電新技術一覽

雖然Quick Charge 2.0充電速度夠快，但Qualcomm已經宣布將會推出Quick Charge 3.0。同傳統充電方法比較，Quick Charge 3.0充電速度快四倍，比Quick Charge 2.0效率提升達38%，約35分鐘已經可以將電量充至80%，亦可延長電池壽命。與此同時，國產品牌OPPO亦有自家快充技術，名為「VOOC閃充」。廠商表示佢比傳統充電速度提高四倍，充電10分鐘即可通話2小時，30分鐘即可將3,000mAh電池充至75%，比起Quick Charge技術更快。品牌旗下R7、R7 Plus、Find 7等手機都支援相關技術，亦有外置電池、車叉等配件，相當齊全。

查詢：（a）3698 4698、（b）2388 4168、（c）2708 8198

文：Vincent　

攝（部分）：Fanny