《聖鬥士星矢—黃金魂》已經喺日本播完四個幾月,不過商品化仲有排未完,事關聖衣神話EX啱啱先出到第四款—巨蟹座迪馬斯古(Death Mask)。話說由「黃金12宮篇」到「冥王篇」,迪馬斯古都絕對唔討好,可以當選最乞人憎嘅角色,連帶影響到商品銷情,甚至淪為「蟹貨」,不過今次嚟到「黃金魂」版本,無論係故事中嘅人設以至Figure造型都成功洗底,重拾黃金聖衣應有嘅尊嚴,相信今次唔使再做蟹貨啩!

聖衣神話EX黃金魂
巨蟹座迪馬斯古
建議零售價︰¥11,000

聖衣組件用上雙色組合,深淺之間更見層次感。

隨盒附有五款表情組件,包括圖中嘅閉目沉思Look。

八隻蟹腳唔使再收收埋埋,大模廝樣喺背脊Show晒出嚟,而且連接位設有活動關節,可以扭向唔同角度,唔會阻住手腳擺動。

聖衣神話EX出現過嘅「離罩」問題,黃金魂版本完美解決,面罩與頭雕組件Fit晒位。

比起原裝版本,「黃金魂」嘅星座形態複雜、華麗得多,不過個人認為新造型似蜘蛛多過似蟹。

大部分「黃金魂」嘅設計,都係背脊多對翼,巨蟹座嘅「千手觀音」Look總算帶嚟驚喜。

新故事成功洗底

話說喺原著之中,迪馬斯古對正義嘅見解,經常搬龍門,簡單嚟講,就係邊個當權就係正義,同當權者對抗就係不義、抵死(其實迪馬斯古唔做聖鬥士,嚟香港做政客絕對大有作為),相由心生、奸到出面,聖鬥士嘅粉絲有邊個唔憎到佢入骨?不過去到「黃金魂」嘅故事,迪馬斯古洗盡鉛華,原本諗住連聖鬥士都唔做,歸隱市井度過餘生,點知一個少女嘅出現,迪馬斯古為咗救佢,重新着起巨蟹座嘅聖衣儆惡懲奸,仲去接濟窮人,愛情嘅魔力大到呢……點都好啦,喺「黃金魂」之中,迪馬斯古成功洗底、轉型,做番個真真正正嘅黃金聖鬥士,令唔少粉絲改觀。

新Figure英氣代奸氣

至於以往商品化嘅迪馬斯古,其實質素唔算太差,不過奸樣做得太滑稽,今次唔使再做奸人,面相當然順眼得多,喺五款表情組件之中,最多都係咧嘴Look有少少邪氣,但亦難掩做番好人嘅英氣。另一方面,黃金魂嘅聖衣主色偏淡,唔似聖衣神話EX咁黃,而黃金魂嘅角位、雕花先至變番深色啲,配色上比起聖衣神話EX更有層次;另一抵讚之處,係聖衣神話EX嘅面罩與頭部有明顯空位,名副其實「離罩」,黃金魂版本就完全冇呢個問題。至於筆者最Like嘅設計,就係由動畫人設方面,八隻蟹腳喺人形狀態時成為背部組件,大模廝樣Show晒出嚟,作用就好似獅子座、白羊座嘅大飛翼,夠氣勢,最重要係舊版巨蟹座嘅「機設」,八隻長蟹腳會屈埋縮短變成人形狀態時嘅裙腳,無啦啦可以縮短晒,完全違反物理狀態,黃金魂嘅新設計就唔再有以上問題。對有心入貨嘅玩具迷嚟講,筆者嘅窩心提示係小心手指,黃金魂巨蟹座布滿角位,係有氣勢嘅,不過角位實在尖,玩完之後,筆者啲手指都見晒紅,十指痛歸心,巴打留意了!

查詢︰2433 1828(瑞華行)

文︰Dick 

攝︰Bowie