抵玩優皮族　Volkswagen Beetle Cabriolet 1.4 TSI 160PS

「土地問題」係本港嘅核心問題，當中無分外圍或內圍，喺寸金尺土嘅香港，一個車位炒到逾百萬元，一個人養兩部車（一部實用、一部玩樂），對大部分廢青嚟講，只能回應「這些機會不屬於我」。不過，想擁有一部型格、經濟嘅開篷車，又兼顧到一定實用性，唔係冇可能，正如Volkswagen Beetle就有合理嘅四座位空間，又有160ps馬力，綜合耗油量低至6.4L/100km，一部車，兼具實用與玩樂雙重特色，咪唔使買兩部車囉！

Volkswagen Beetle Cabriolet 1.4 TSI 160PS

想升級改用19吋Tornado輪圈，連稅售價$30,000。

頭燈整合咗LED日間行車燈，為經典嘅Beetle添上時尚氣息。

引擎容積只有1.4L，但係馬力高達160ps。

尾箱空間足夠放置行李篋，以開篷車嚟講實在難得。

多功能軚環用上皮革包裹，仲有加減波按鍵。

錶板採用三圈式布局，行車資訊清晰易讀。

波箱屬於七前速規格，有助減少高速巡航嘅耗油量。

音響系統可透過藍芽與智能手機連接，隨時聽到心愛音樂

後排乘坐空間算唔錯，大人乘坐都接受得到。

要數歐洲開篷車嘅優皮代表，Beetle一定高票當選。

潮流嘅嘢，有時好難理解，70年代嘅橡皮鴨仔可以興完又興、小鳳姐可以紅遍本地網絡世界，就連盧海鵬都重出拍「廣告」，仲要被網民激讚，應該點解讀？借網絡用語一用︰「識條鐵」咩！復古係永不過時嘅潮流，提到汽車中嘅經典，甲蟲車一定上榜，70幾年嚟經過多次換代轉款，全球粉絲仍然不離不棄，名人車主不計其數；有啲潮流玩一季，甚至一個月就完，甲蟲車偏偏歷久不衰。今次測試嘅Beetle Cabriolet 1.4 TSI 160PS，換咗19吋Tornado輪圈，又有Sharp到爆嘅橙色車身，玩味更濃！

1.4L TSI有驚喜

揸開篷車係一種樂趣，要實用，可以直接買MPV，再唔係考慮五座位嘅Golf Sportsvan。當然，Beetle並非趕絕外母嘅零實用開篷車，後座空間比市場上好多2+2座位編排嘅汽車理想得多，只要閣下唔係高腳七，其實可以接受，不過記得叫駕駛者閂篷，皆因坐後座非常食風，無論幾肚餓都好，上Highway保證會飽到乜都唔想食，如果當係難得嘅Free Lunch機會，咁就隨便你。今代Beetle沿用上一代嘅電動軟篷，按鍵就可操作，就算駕駛者唔想閂篷，做乘客嘅都可以強行控制，開閂過程分別只需9.5秒及11秒，行車期間（50km/h以下）都操作得到；強行唔太好？唔會啦，潮流興強行，好似強行填詞……

今日嘅Beetle比起元祖甲蟲車大部咗好多，車身亦加入大量現代化元素，頭燈整合咗LED日間行車燈，不過望上去，仍然係不折不扣嘅甲蟲車。今次測試嘅Beetle Cabriolet配備1.4L TSI引擎，導入直噴及雙增壓（Turbo及Supercharge）技術，加速性能比一般嘅1.5L私家車強得多，馬力與扭力分別達160ps及24.5kgm，配合七前速雙離合器波箱，0-100km/h只需8.6秒，所以咪以為甲蟲車得個樣、快極有限，燈位起步隨時輸畀佢。此外，新Beetle又有XDS電子差速鎖，進一步提升攻彎穩定性，而且有效減少推頭現象，就算懸掛設定唔似同廠嘅Scirocco咁Firm，操控依然靈活，而且舒適性更佳。

實用設計超出預期

Beetle嘅軟篷結構比電動硬摺頂簡單，打開後，佔用嘅車尾空間唔算多，依然擺到中小型行李篋，必要時可以翻平後座，打通尾箱與後排，擺放長形物件都唔成問題。車廂裝潢及配備都好切合年輕人口味，中控台用咗與車身同色嘅飾板，車身內外互相呼應，處於開篷狀態下，更顯型格一面。另一方面，屬於標準配備嘅Composition Media音響系統配置八個喇叭，又可透過藍芽與智能手機連接，播放音樂串流軟件嘅歌曲，開住篷聽真Coldplay、OneRepublic，超爽！目前廠方已將Bi-Xenon頭燈、後擾流、真皮多功能加減波軚環、定速巡航、無匙系統、Hill-hold Control及胎壓監測系統列為標準配置，豪華設備應有盡有，$359,980起就可擁有一部咁齊料嘅開篷車，確有一定叫座力。