Samsung Galaxy A 情「鋁」機出門

農曆新年長假就到，適逢踏正情人節，不少情侶都心思思買想番套情侶機，一人一部帶去旅行。Samsung新出的Galaxy A 2016年系列就為佢哋而設，雙面玻璃、鋁金屬中框、指紋掃描及光學防手震鏡頭共冶一爐，並有齊A7、A5一大一細型號選擇，揸上手保證「放閃」成功！

（左）A5 $2,898
（右）A7 $3,298

A5（右）及A7（左）的設計一模一樣，只是屏幕有5.2吋及5.5吋之別。

機背覆蓋上2.5D Gorilla Glass強化玻璃，在燈光下更亮麗。

搭載了指紋識別Home鍵，登記後按壓指紋即解鎖。

八段美肌功能，不過效果都幾誇，用時咪咁重手啊！

提供專業、全景、連拍、HDR及夜拍等拍攝模式，玩味十足。

內置八核心處理器，跑分有35,817分，表現對辦。

可下載Samsung獨家《KNOX》，「一機雙開」兩個WhatsApp帳戶。

玻璃加持外形靚絕

2015是Samsung失望的一年，銷量不說，單是Google年度搜尋榜只有Note 5一機入榜，便知品牌光環不再。在芸芸眾機中，Galaxy A算賣得比較好，因此甫踏入新一年，廠商已急不及待推出2016年版，務求贏回用家歡心。以外形論，廠方似乎成功，因為A5、A7的確靚絕，機身正背覆蓋上2.5D Gorilla Glass強化玻璃，燈光下剔透亮麗；同時中框用上鋁金屬打造，厚度更只有7.3mm，提供一定防撞能力之餘，還能輕鬆插入褲袋之中。美中不足是A7頗為墜手，所以較適合男士使用。顏色方面，A5備有金及黑，A7則備有金、粉紅金及白色選擇，比舊版更為好色水！

八段美肌畫面鮮艷

要做旅行機，影相當然要具一定質素。這方面兩機同樣配備1,310萬像素後置鏡頭及500萬像素前置鏡頭，支援F1.9大光圈及光學防手震功能，昏暗下依然能拍出清晰影像。一如過往它也支援120°廣角自拍、手掌自拍及八段美肌，還有瘦臉及假大眼功能，女士唔化妝都靚爆鏡。當然鏡頭也非全無缺點，例如對焦稍慢，測光亦未算準確，容易有過度曝光問題，拍攝時要注意了。屏幕則採用Super AMOLED材質，兩者相差0.3吋，但就同樣提供1,080p解像度。肉眼所見，畫面鮮艷奪目，並有着Super AMOLED一貫的味精感覺，有人未必喜歡，小記睇慣就覺得問題不大。

運作流暢指紋識別

雖然是2016年最新手機，但A5、A7沒有升級採用Android 6.0系統，依然停留在Android 5.1階段。好處是系統已經非常成熟，與自家製TouchWiZ介面完全磨合，撥頁、開App以至打機都十分流暢；同時它們兼容獨家《KNOX》程式，可「一機雙開」兩個WhatsApp，至啱擁有兩個帳戶的朋友使用。新機另一賣點是為Home掣追加指紋識別能力，登記及辨識速度都快，雖然不能在熄芒情況下一按即解，又只能登記三組指紋，但中階機有機王級功能就不要投訴太多了！最後一提，它們都對應雙卡模式，兼容香港FDD-LTE及內地TD-LTE網絡，並可經系統選擇以SIM 1或SIM 2接收4G，輕鬆一點便能切換網絡！