《人中之龍極》重製注入新元素

大家記唔記得初代《人中之龍》係幾時推出？原來係2005年12月，已經係十年前的事，當年仲係PS2版本。十年後，開發單位決定高清重製這套名作，改成《人中之龍極》，主線大綱仍然係桐生一馬同100億少女「遙」的故事，當中好多細節位都因應潮流時勢而加以改良，對Fans來說都好有吸引力！

《人中之龍極》

真島真係無所不用其極，甚至會化身成公關小姐勾搭桐生。

不知大家認唔認得出波多野結衣呢？

桐生一馬最終會練成最強的「堂島之龍」戰鬥風格，成為街頭戰王者。

真島吾朗會使出截然不同的戰鬥風格，如源自《人中之龍0》的「舞者風格」。

改編自Sega街機遊戲《昆蟲王者》的《昆蟲女王》迷你遊戲，十分養眼。

是次SCEH也有為《人中之龍極》推出PS4主機同綑版，當中包括500GB PlayStation 4主機、遊戲及PlayStation Plus 12個月會籍卡。$3,280

發狂真島燃起桐生鬥志

《人中之龍極》仍然係講江湖人物桐生一馬以及遇上100億少女「遙」的故事，主要填補番初代遊戲的部分劇情，令故事更完整，亦可以明白箇中的來龍去脈。今集加入有趣的新系統，名為「無所不在的真島」，簡單來說就係無處不在、兼且會易容化身的真島吾朗（也是桐生一馬的宿敵）會不時騷擾及襲擊桐生一馬，主要係想激發已坐監十年的桐生的「小宇宙」，從不斷戰鬥中令桐生學識新技巧同必殺技。不過這位恍如「吊靴鬼」的真島都幾煩，會突然從人堆中現身、推開坑渠蓋現身，甚至乎會着女裝扮公關小姐，真係好癲！

追加《人中之龍0》戰鬥風格

可能見玩家受落上一集《人中之龍0：誓約的場所》的多種戰鬥風格，今次都有樣學樣；真島會使出「幹架師風格」、「舞者風格」等戰鬥風格，桐生亦會從中領悟出「流氓風格」、「火爆浪子風格」、「快攻手風格」以至最強的「堂島之龍」風格，就算有玩過初代遊戲的玩家都可從中感受另一番味道。新一集也有抵死迷你遊戲，例如有四驅車比賽，又將Sega街機遊戲《昆蟲王者》改編成《昆蟲女王》，其他特別玩法就等玩家自己發掘。同上次《人中之龍0：誓約的場所》一樣，遊戲總監督名越稔洋會帶同性感女優到港宣傳，今個星期日就會現身深水埗西九龍中心，而在遊戲中會以公關小姐角色出場的波多野結衣都會來；另外遊戲會推出繁體中文版，而且附送埋預計年底推出的《人中之龍6》試玩版，好抵買呢！