所謂「男人愛高達，女人唔明白」，但男人玩葉問，女人就一定唔會過問，反差咁大，皆因《葉問3》入面葉師傅成功塑造一個好男人形象，感動到唔少女觀眾，所以將呢隻Enterbay 1/6葉問帶返屋企，屋企隻老虎乸唔只冇投訴，話唔定會仗義「資助」呢！

EB Real Masterpiece《葉問3》1/6葉問
售價：$1,480

1/6版本嘅六點半棍，都有超過13吋長，搵位擺都唔係咁易。

素體有30個關節，擺詠春甫士冇難度。

包裝盒印有《葉問3》嘅戲名字款及丹爺大頭，咁精美叫人點捨得掉？

木人樁加埋武館場景，前者仲有舊化，加分！

八斬刀刀身用金屬打造，質感冇得輸。

「詠春正宗」牌匾係立體製作，唔係求其彩色印刷算數。

衣服造工細緻，可惜虛位唔少，容易起摺。

10款造型手掌跟足詠春拳設計，小念頭、尋橋、標指等一一有齊。

額外跟多套灰色唐裝長衫，夠Fit身，可惜鈕扣太細，着上身相當考耐性。

去年聖誕電影檔期，《星戰》單挑《葉問3》，連同Action Figure都分庭抗禮，提起星戰Figure，筆者呢幾個月都寫到有啲「膩」，所以今期遇到宇宙最強、一個打十個嘅EB葉師傅，當堂成為一道清泉。EB唔係第一次出葉問，早喺五年前第一集上畫，亦已同步推出，筆者都有幫襯，時至今日再出，能否吸引舊玩家再追？答案係︰Yes！齋講頭雕像真度已經提升唔少，由SCUDERIA落刀、YJ塗裝指導，輪廓、鼻樑、耳仔、面頰都似足真人，就連唔玩Figure嘅攝影師阿Man都有同感，而且髮型細緻有層次，眼袋、皺紋亦加深咗，更顯老成持重嘅大師風範。

詠春妙手 入型入格

今集葉師傅要同泰臣及張晉過招，動作慢少少都唔掂。今次嘅Figure同樣身手靈活，素體有30個關節，試玩過後，發覺比前作靈活，而且雙手雙腳更易向內靠攏，符合詠春拳嘅中線拳理。隨盒附有10款造型手掌，仿照詠春套路設計，攤手、黐手、小念頭、尋橋、標指等統統有齊，既係玩具迷，又係詠春門人嘅朋友見到，分外有親切感。配件方面，今集金山爪掛住同JJ結婚，葉問冇同佢對打，所以唔似上次跟埋雞毛掃畀大家，不過唔緊要，因為八斬刀及六點半棍仲吸引，把刀用金屬製作，質感十足，至於六點半棍就跟番比例有成超過13吋長，台型十足，不過大家要搵位Display時，相信都要花一番工夫。

場景道具　統統交足貨

EB嘅地台場景一向畀足心機冇得輸，今次嘅葉問都唔例外，附有「葉問家」與「張天志武館」兩款場景，襯埋「詠春正宗」立體牌匾，以及比舊版大件得多嘅木人樁，Show晒出嚟，就好似片場一樣。不過今次嘅Figure並非冇缺點，例如頭雕得一個，若然加番個戰損Look，將來夾埋隻泰臣Figure對打就更入戲，再唔係跟多個微笑Look，令人諗番起葉師傅同老婆跳舞嗰一幕都好吖！至於長衫嘅質感與剪裁，雖然都有水準以上嘅像真度，但係扣位實在太細粒，筆者多番嘗試都扣唔到，如果改用啪鈕就易玩得多。

查詢：2751 9018、2332 3615

文：Gilbert　

攝：Man