對玩具迷嚟講,有邊個唔鍾意農曆新年?因為利是錢真係幫補唔少。點知,猴年仲有大半個月先到,Bandai嘅Tamashii Nations已經大發新年財,推出以二○一六猴年為題嘅SR超合金鐵甲萬能俠,話晒都係第一款以生肖為題嘅超合金作品,對於Die Hard嘅收藏家嚟講,點會唔心思思想破財?

SR超合金鐵甲萬能俠1號2016農曆新年限量特別版建議零售價︰¥8,000

左、右兩邊嘅高熱火燄組件,分別印上「二○一六」及金猴圖案。

小腿與飛翼換作金色之餘,亦都印有小猴圖案與「二○一六」字樣。

朋友號嘅造型相當袖珍,仲細過一毫子。

主體以五年多前嘅同系作品為基礎,再喺身上多個位置換上寓意吉祥嘅金色。

承襲舊作嘅高可動性,特別版都做到雙手揸劍嘅甫士。

連埋呢款農曆新年特別版,同一個模嘅SR超合金鐵甲萬能俠已經出過六個版本,睇怕下次應該係全新開模設計,唔會再新瓶舊酒啩!

雖然可動性依然高,可惜少咗特效Parts,重現唔到鐵甲飛拳發射時噴射效果。

手肘與膝頭依然有蓋掩式關節,可動性與造型美兼具。

史上首次 生肖版超合金

相信唔少玩具迷上網都會睇到,Bandai將會喺今年五、六月推出鐵甲萬能俠與Hello Kitty嘅Crossover超合金特別版,不過對男生嚟講,睇怕都幾難接受。雖然都係新瓶舊酒,但係今期上架嘅SR農曆新年特別版,顏色點改都好,都比同Hello Kitty玩跨科正氣得多、順眼得多啩!今次嘅特別版係以五年多前嘅SR第一款作品—鐵甲萬能俠1號為基礎,由尺寸、重量到關節都一模一樣,最明顯嘅變動係胸部、前臂、腰、小腿,仲有飛翼都換成象徵富貴、吉祥嘅金色,切合農曆新年嘅喜慶氣氛。至於最貼題嘅設計,係心口嘅高熱火燄Parts、左腳小腿與飛翼,加上卡通造型嘅小猴,以及中文字「二○一六」,而且線條運用充滿華風色彩,仲唔夠應節?

主體依舊 Parts偏少

正如前文所講,呢款萬能俠特別版嘅主體,其實源自五年多前嘅舊作,舊,唔代表唔好,好似當年好多人讚嘅蓋掩式關節設計,今次特別版都有用,令手肘、膝頭有高度可動性之餘,亦保持線條嘅完整性。至於Parts方面真係要彈,以為特別版既有舊作Boxset嘅部件之餘,仲會將當時同步另售嘅飛翼連特效Parts Boxset都落齊,點知開盒只係見到朋友號、飛翼、寶劍及六款造型手掌,前作都有嘅銀色大拳頭及大手掌,以及發射鐵甲飛拳嘅噴射特效Parts都唔見影,只係多咗特別版專屬嘅地台連支架,後者仲要冇乜實際用途;既然係超合金,萬能俠當然有番咁上下重量,全膠件製成嘅地台根本唔多受力。之前嘅舊版萬能俠賣¥3,500,飛翼連特效Parts Boxset,就賣¥1,000,今次嘅新年特別版就標價¥8,000,價錢高咁多,Parts反而少咗,就算換咗顏色又多咗應節圖案,都唔多講得通喎!Any肥,作為第一款以農曆新年、生肖為題嘅特別版超合金,始終係有Gimmick嘅,尤其是專門收藏特別版玩具嘅Kidult而言,睇怕都係唔買唔安樂,筆者都一樣……唔知各位姨媽姑姐親戚朋友,可唔可以預支利是畀我找數先呢?

查詢︰2433 1828(瑞華行)

文︰Dick 

攝︰Homan