近年嘅高達動畫，出親都係兩套打孖上，一套開拓新生代觀眾，另一套就照顧舊粉絲，好似去年唔只有《鐵血之孤兒》，《Gundam The Origin》亦都正式動畫化，後者肯定喚起大家對元祖高達及一年戰爭嘅童年回憶，加上安彥良和對故事與機設重新詮釋，懷舊之中亦不乏新鮮感。動畫既已行先，模型還會遠嗎？The Origin版本嘅白色惡魔—RX-78-2 Gundam早前已經MG化，老老實實，RX-78-2嘅模型版本，多到手指加腳趾都數唔晒，今次仲會有新意？

MG 1:100
MS Gundam The Origin RX-78-02
建議零售價：¥4,500

前期型光線來福槍嘅槍身比較笨重，正正係The Origin嘅機設特色。

肩炮設有雙關節，炮身又可拉出及獨立轉動，唔怕畀高達頭上嘅V形天線頂住。

兩支光線來福槍都可懸掛喺盾牌之內，雙手揸劍都唔使丟晒啲槍。

拆咗肩炮，背包可以換番做傳統雙劍版本。

右胸嘅格林炮，以及前臂嘅機關槍，都可以加裝特效組件。

胸、腰之間內藏兩段式可動機關，拗身扭腰嘅幅度大過Ver.3.0。

髖關節有趟前設計，而腳掌設有三段式可動功能，令跪姿更自然。

屈膝時，大腿裝甲有前後移位嘅連動效果。

肩甲與膊頭都係分件式設計，藉此增加舉臂幅度。

五隻手指都獨立可動，而且都算穩陣有力唔易甩。

動漫機設　忠實還原

雖然同係RX-78-2，但係同元祖版本相比，The Origin嘅機設的確有好多唔同。筆者砌過兩年幾前嘅MG Gundam Ver.3.0，呢個版本用咗1:144 RG嘅分件及分色設計嚟增添層次感，至於The Origin版本，造型還原動漫中嘅「樸素」風格，線位嘅複雜度介乎Ver.2.0與Ver.3.0之間。機體特徵方面，就將The Origin嘅機設特色一一重現，例如背包可以加裝肩炮，盾牌又可以上下倒轉拎，加埋造型較為累贅嘅前期型光線來福槍，連帶非對稱嘅上胸設計，有追開The Origin嘅粉絲見到，相信都唔會有挑剔。除此之外，上胸左右兩邊嘅雙連裝飛彈及格林炮，以及左前臂嘅機關槍，都可以喺炮口加裝透明特效組件，傳神展現開炮嘅情景。再者喺組裝上比Ver.3.0輕鬆，事關唔少水口都做得夠薄，只要剪件小心啲，已經可以盡量減少瑕疵，之後出動埋畫線筆，素組之後已經見得人。

關節構造　重新設計

MG Gundam The Origin唔只追求還原動漫機設，仲喺可動性落咗唔少工夫。回想之前嘅Ver.3.0，由於要內藏Core Fighter，上半身嘅可動幅度相當有限，The Origin就冇呢個包袱，於是可以喺腰腹內增設一個兩段式可動機關，令上胸與腰部之間能夠前後左右全方位大幅轉動，加埋肩甲、膊頭都係分件設計，可以輕易做到舉臂過頭嘅動作。下半身方面，由於髖關節有趟前機關，屈膝時可以增加大髀嘅抬高幅度，仲配合裝甲連動效果，就連腳掌都有三段式可動設計，壓腿跪姿就擺得更自然。

查詢：2433 1828（瑞華行）

文：Alfred　

攝：Kent