蘇凱男教路　渣馬最後備戰

仲有幾日就到渣馬，報咗名嘅朋友會唔會好緊張，呢幾日就連食多啖飯都怕出事？今屆比賽改咗路會唔會難跑咗？甚至擔心人逼人，等起跑時冇位做熱身？唔使擔心，我哋邀請咗「肯亞徐」嘅教練、Nike Master Coach嘅長跑達人蘇凱男，同大家分享最後階段嘅備戰Tips！

就算平時點夜瞓都好，蘇教練建議跑手呢幾日都要早啲瞓，爭取休息之餘仲要調整生理時鐘，為周日晨早嘅比賽做好準備。

呢期天氣轉冷，唔想抱病影響參賽，不妨食多啲含豐富維他命C嘅生果，增強抵抗力。

今屆全馬及半馬嘅初段賽道改入旺角，由於有暗斜，加上預期多咗市民打氣，蘇教練提醒跑手小心跑快咗，以免影響後段發揮。

熱身第一式

熱身第二式

熱身第三式

熱身第四式

熱身第五式

Nike AS Impossibly LT Jacket Hooded $699
Nike Power Speed Tight $899

Nike Vapor Flash 2.0 Running Waist Pack $259

改道旺角小心跑快咗

香港人有邊個唔夜瞓？不過報咗名跑渣馬嘅朋友，呢幾日真係要改一改，蘇教練說︰「無論跑邊組，試試每晚提早一個鐘頭去瞓，除咗爭取時間休息，仲要調整生理時鐘，因為渣馬好早起跑嘛！」至於飲食方面，煎炸嘢、油分多嘅食物當然要戒，有啲跑手會進行Carbon Loading，對新手而言，如果之前冇試過嘅話，蘇教練就唔建議貿貿然試，但係生果不妨食多啲，蘇教練解畫︰「賽前最怕會病，尤其是呢幾日明顯涼咗，平時可以多食有豐富維他命C嘅生果，例如奇異果，增強抵抗力。」蘇教練再提醒跑手，起跑前一個半至兩小時前係最佳嘅進食時間，食物盡量簡單，唔好有油分，因為難吸收，有輕瀉作用嘅食物更加唔好試︰「如果你之前冇飲慣鮮奶，比賽前就唔好破例了，到時搵洗手間都幾麻煩。」

對於全馬及半馬跑手而言，相信最關心嘅係改道問題，今屆喺尖沙咀彌敦道出發，之後改去旺角嘅亞皆老街及櫻桃街一帶，先至轉入西九龍公路，會唔會難跑咗？蘇教練解釋說︰「其實旺角嗰段偏向平路多，以成個賽道嚟講，上落斜嘅比率會少咗，容易咗跑，市民又容易咗去打氣，畀到支持跑手。但係呢條路屬於比賽初段，留意氣氛好咗，可能令大家跑快咗，而且旺角嗰段有少少暗落斜，所以控制步速就要小心啲，初頭嗰段唔建議跑得太快。」

原地熱身唔怕人逼

平時練習都要做足熱身，何況參加渣馬！不過每屆賽事都人逼人，尤其是起步區，仲有位做熱身？蘇教練就示範以下五式，空間窄窄都可做得到。

裝備小貼士

天文台預告，比賽當日又凍又濕，蘇教練建議跑手準備有跣水能力嘅薄身外套或者雨褸︰「跑到尾段，尤其是全馬，體力消耗好大，落雨嘅話仲會加快體溫流失，有件外套或雨褸喺身就會發揮到保溫作用。」不過比賽中途，如果氣溫冇預期中咁低，想除低外套又唔知放邊，唔通隨地丟？跑手不妨帶備跑步腰包，專為跑步而設嘅外套，多數都好薄身，摺埋之後放入腰包就冇問題啦！

另一方面，愈嚟愈多跑手鍾意着Legging，其實有咩好處？蘇教練說︰「一來可以保溫，因為體溫流失得快，運動表現就會下降，另外保溫得嚟唔會有風阻，因為成條褲都貼腳，唔似普通長褲會構成風阻，影響跑步時嘅感覺。」