最後召集　adidas Boost Expo

距離渣馬得番一個禮拜，大家做足準備工夫未？唔通adidas擔心大家備戰不足，所以喺太古城舉行adidas Energy Boost Experience Expo，Show咗全新嘅Energy Boost 3及Ultra Boost ST跑鞋之餘，仲Set咗跳飛機、高低跳欄等練習設施，唔只實牙實齒測試令人「試過返唔到轉頭」嘅Boost中底有幾厲害，仲可以郁郁手腳提早熱身，早前紀嘉文同劉心悠已經到場試玩……點解？點解我唔係紀嘉文？點解陪心悠BB跳飛機嗰個唔係我？

adidas Boost Expo

今日就係adidas Energy Boost Experience Expo嘅Last Day，咁出位嘅試鞋活動，跑步愛好者唔好錯過。

紀Sir玩跳飛機，係唔係好Pro好型呢？因為佢示範緊畀心悠BB睇……其實我玩跳飛機都好叻，點解示範嗰個唔係我？

今屆嘅半馬與全馬賽道有變，紀Sir認為新增嘅彌敦道路段風力較少，而且路段較直，對跑手或者有正面影響。

「畢業」唔係完結，心悠BB話完成今屆渣馬10km賽事後，有興趣下屆升級改玩半馬，巴打們收到啦，下屆記住報半馬。

跳飛機之餘，心悠BB仲玩埋高低跳欄等運動設施，此情此景，相信各位巴打都會即時諗起︰運動女生起碼加10分！

adidas Energy Boost 3 $1,299

鞋底中間設有Torsion System，穩妥連結前、後掌，減少足踝扭傷嘅機會。

鞋面改用Engineered Stretch Mesh，對唔同腳形嘅跑手而言，都有舒適嘅貼腳效果。

鞋側設有Fitframe，有助支撐腳掌兩側，配色方面仲令人諗起經典嘅EQT。

平時買鞋，最多只可以喺舖頭着上腳行兩步，試試啱唔啱腳形，到底夠唔夠Support、緩震表現如何等等功能上嘅特性，又點可能行兩步就清楚。為咗證明最新抵港嘅Energy Boost 3有幾厲害，adidas Energy Boost Experience Expo就有跳飛機、高低跳欄、繩網及跑道等設施，畀大家又跑又跳試出Energy Boost 3嘅真功夫。是項活動喺星期五開幕，Last Day就係今日，就算你冇報到今屆渣馬，只要你係跑手，又鍾意試新鞋，冇理由唔去囉！

Energy Boost 3任跑任試

講番今次嘅主角Energy Boost 3，沿用全掌式Boost中底，發揮超強嘅緩震與回彈表現外，鞋面改用Engineered Stretch Mesh，呢種數碼編織嘅新物料，彈性分外高，令唔同腳形嘅跑手，都會覺得貼腳而唔夾腳。除此之外，鞋身兩側設有Fitframe，加埋鞋底嘅Torsion System，發揮出眾嘅支撐及承托作用，無論應付練習或比賽，用家都可以放心晒。除此之外，Energy Boost 3以「深灰×湖水綠」作為主打配色，設計靈感正正嚟自90年代三間牌經典嘅EQT「Equipment」系列，作為品牌嘅死忠派粉絲見到，就更多一份「想當年」嘅情懷。

紀Sir心悠賽前有Say

早前「紀Sir」紀嘉文及長跑女神心悠BB，唔只喺開幕禮上試着試玩，仲分享長跑心得。唔講都唔知，原來今屆渣馬係心悠BB第10次參賽，佢仲打趣咁話，加埋呢屆，佢就累積比賽咗100km咁多，所以對今屆賽事加倍在意，甚至有「畢業」嘅感覺。點解佢對香港馬拉松咁長情？佢話︰「香港馬拉松係我第一次接觸馬拉松嘅地方，之前我唔知乜嘢係馬拉松，亦都唔知原來跑步係咁Serious……仲記得第一年跑完，衝線嗰一刻，因為冇其他經驗比較，嗰種喜悅係無限大，同埋全香港人喺嗰條橋，一年得一日喺嗰條橋跑步，所以係好難得、好珍貴。我都有諗過去其他國家跑馬拉松，今年順利完成嘅話，我都諗下去日本，或者加拿大，即係一啲空氣好好嘅地方跑步。」

心悠BB就向佢嘅第一個100km努力，至於身為香港半馬紀錄保持者嘅紀Sir，征服過嘅賽道更加長，比賽經驗當然深厚；根據天文台預測，比賽當日嘅天氣認真麻麻，又凍又濕，紀Sir就有以下建議︰「開頭跑嗰陣千祈唔好太快，始終濕度高會影響散熱。濕度高嘅話，跑起上嚟我會保守少少，開頭會拿捏好個Pacing，跑番個感覺先，因為一開頭就跑咁快，好易令身體積聚乳酸，所以我嘅慣性，如果喺陰天，或者天氣唔穩定，開頭會保守少少，跑到咁上下，身體真係Warm Up晒，先再加速都未遲。」另一方面，屆屆渣馬都人頭湧湧，「塞車」在所難免，對於想破PB嘅參賽者而言，有冇方法突圍呢？紀Sir再次教路︰「預早少少上起跑線，『贏在起跑線』真係幾重要，若果差成100m，前面又積滿人，的確好難避開佢哋。如果真係發生呢個情況，我建議盡量靠邊跑，會容易啲過到人，但係要小心啲，因為多人嘅話，好難留意到路面嘅坑渠位、貓眼石，自己要注意番、小心啲。」

人靚心更靚

常言道︰運動女生起碼加10分，如果連心地也好嘅話，當然要再加分。話說心悠BB咁重視自己嘅第10個渣馬賽事，為咗想更加有意義，所以同步舉行籌款，與本地一間工作室合作，製作「ANN-馬拉松冬季限定100%純手工皂」作義賣之用，幫助對象係黏多醣症病患者，每套有四塊，限量150套，每套售價$180，有興趣幫心悠BB行善嘅話，就要快快以電郵方式列明聯絡人姓名、電話及訂購數量等資料，成功訂購者將會收到確認通知，總之有心人出手要快，祝君好運！

電郵地址︰adidashk_running@adidas.com