平民追風族　Mazda MX-5

揸500ps開篷車係好玩，但幾球嘢嘅車價，又有幾多人負擔得到？想享受開篷樂趣，又要操控好玩，未必一定要揸成層樓出街咁高消費嘅，例如向來被認為靈活好玩嘅萬事得（Mazda）MX-5，就係平民開篷跑車嘅恩物，代理仲為全新第四代MX-5加推「MAZDASPEED擾流及鋁合金腳踏套裝」作為選配裝備，唔只賣相更有運動風格，亦同時為呢款經典優皮跑車增加魅力。

Mazda MX-5

引擎配備i-stop及i-ELOOP系統，以NEDC模式計算，耗油量僅14.9km/L。

手動軟篷結構較簡單，而行李箱空間亦算有交代。

加裝MAZDASPEED組件後，賣相更有侵略性。

尾燈組合包括由第一代MX-5沿用至今嘅圓形主調，延續經典色彩。

錶板採用三圈式設計，頗有跑車風格。

車廂裝潢充滿動感氣息，設備亦相當齊全。

短行程波棍唔只手感好，轉波亦爽快利落。

原廠配備17吋輪圈，輪胎尺碼為205/45 R17。

音響系統整合咗九個BOSE喇叭，附設RDS功能。

好玩、有型、易「上車」，對於普羅開篷跑車迷而言，MX-5代表咗無懈可擊。

跑格新Kit添魅力

開篷車的樂趣，唔一定要好快，亦唔一定要惡形惡相，揸起上嚟有Feel、操控夠爽，已經令人好滿足，MX-5就係當中嘅佼佼者。經過26年演變，MX-5全球銷售逾95萬部，算係多定少？現時健力士世界紀錄大全中嘅「最暢銷雙座開篷跑車」就係MX-5，你話呢？MX-5講求輕巧靈活與高度駕駛樂趣，新一代喺呢兩方面都有相當出色嘅表現，SKYACTIV科技並非單純一個口號，佢嘅理念唔只藉減重嚟提高效率及操控表現，亦係一個綜合性節能方案。比起上一代，新MX-5嘅整體車重減輕約100kg，以手波版為例，只重1,117kg，燃油效益大幅提升25%，耗油量只係6.7L/100km，減重策略嘅成果顯而易見。今次追加嘅「MAZDASPEED擾流及鋁合金腳踏套裝」，包含裙腳、尾擾流、鋁合金腳踏及MAZDASPEED貼紙等，跑格車迷必Buy！

手波才是王道

本港嘅私家車車主，十居其九都揸慣自動波，不過MX-5嘅擁躉就係例外，據代理講，手波仲好賣過自動波！揸過上一代MX-5嘅車迷或者會有同感，制動腳踏嘅位置有啲偏左，筆者甚至聽過有車主反映，揸車時要將身體輕微向左扭先至順腳。以上問題再冇喺新一代MX-5身上出現，制動腳踏由原來嘅偏左移向偏右位置，腳部動作明顯自然咗，配合以人體工學設計嘅駕駛席，減少腰間及腳部疲勞，揸得舒服之餘，亦非常有利操控。

從第一代MX-5至今，車頂都用軟篷設計，亦冇跟隨潮流追加電動開閂功能，有人認為此舉係慳成本，亦有人覺得咁先夠型、夠經典，姑勿論如何，MX-5嘅手動操作軟篷就係大把人Like，打開時只要一撥解鎖，再將篷頂向後推就搞掂，幾瀟灑，比起電動設計，機件損壞嘅風險都少啲。動力方面，MX-5搭載2.0L SKYACTIV-G直四引擎，馬力與扭力分別達160ps與20.4kgm，雖然數值唔算驚人，但車身夠貼地、重心低，行車時嘅速度感往往比實際更強，加上轉向系統用咗較細嘅轉向比例設定，揸上手頗有跑車Feel，而且MX-5仲贏埋最近嗰屆嘅日本年度風雲車大獎，仲唔夠說服力？