韓流唔失禮　Hyundai Tucson Premium

提起SUV，歐洲型號係唔少車迷嘅首選，不過老實講，SUV嘅售價已經比傳統房車高一截，更何況係歐洲品牌？動輒30、40萬元起嘅價位，未必人人負擔得起。其實30萬元樓下嘅SUV，並唔係冇，現代（Hyundai）Tucson就係好例子，性能表現以至車廂布局唔會輸畀歐洲車之餘，最得民心係閂門時清脆嘅「卡」一聲，「鋼水」似足歐洲車，性價比之高可想而知。

整體布局頗有歐洲車風格，格調與別不同。

波棍台用咗全黑色設計，如果多番啲顏色會吸引啲。

中控台布局工整、簡潔，如果有埋大型屏幕就更加完美。

車尾設有頂置式小尾翼，動感氣息唔會輸畀歐洲對手。

2.0L直四自然吸氣引擎嘅馬力為155ps，足夠應付日常需要。

頭燈罩嘅線條相當銳利，與六角形鬼面罩襯到絕。

天窗佔咗車頂面積2/3，開揚程度冇得輸。

車尾標準置物量為531L，有需要嘅話，可以擴充到1,503L。

1,503L好器量

作為SUV，就算係中型級別，車廂空間都唔可以輸蝕，Tucson Premium就交足貨，後排有充足嘅Head-room與Leg-room，可以安坐三位成年男性之餘，全車都係皮椅款式，檔次唔會輸畀歐洲對手。駕駛席方面，由於Tucson車身比較高，「大銀幕」又夠大，帶嚟廣闊嘅前方視野，筆者特別鍾意幼身嘅A柱設計，有助減少盲點，開車轉右彎時就最易明白。

唔只坐得闊落，Tucson仲「有容乃大」，車尾標準置物量已經有513L，夠位放摺合式單車，收起後排就可以擴充至1,503L，遲啲農曆新年辦年貨都幫到手。車廂設計方面，其實幾有歐洲車Feel，中控台採用T字形布局，風口就係不規則出位設計，略嫌嵌入式音響面板面積細咗啲，好彩按鍵擺位夠一致，唔似部分日系車分布零散，唔夠User Friendly。波棍台右邊設有按鍵，前方有一個小型儲物格，見出設計師嘅心思，用盡車內每吋空間，若然改用銀面飾板，就更加有姿勢有實際。多功能軚環已經係現今汽車嘅標準裝備，Tucson都唔例外，稍嫌按鍵位置過於「置中」，對手指短嘅駕駛者而言唔係咁方便。

性能表現不慍不火

Tucson所用嘅2.0L自然吸氣直四引擎，力量輸出唔算猛烈，但一定夠用，馬力與扭力分別為155ps與19.6kgm，配合六前速自動波配加減波，起步反應中規中矩，之後走到大直路，中段力量明顯變強，至於攻彎車速實在不宜太高，整體而言，喺公路行駛保持到一貫穩定性，作為日常代步，理應冇投訴，若然你追求極速刺激嘅話，都係揀番跑車算啦！

正如上文提及，Tucson標榜性價比高，唔只售價相宜（今次測試嘅係齊料版Premium，車價$268,000，入門版只係$228,000），就連油費開支都好有分寸，平均耗油量只係7.9L/100km，按照目前油價計算，油費約$1.1/km，以中型SUV嚟講，相當難得。