來年科技大勢預告

流動篇：旗艦機Phone繼續吹

2016相信係iPhone 7出場嘅年份，iPhone 6、6s兩代都被指舊酒新瓶，新功能好似3D Touch又唔太好用，令到大家對iPhone 7有另一番期待。早前外國大小媒體都流出突破性嘅消息，有報道話，Apple成功獲得「Active Screen Protection for Electronic Device」專利，即係裝置跌落地時會自動彈出防撞欄，如果新一代iPhone真係內置呢個功能，就可以避免手機墜地爆芒，到時玻璃貼、三防殼咪可以慳番？

智能手機向來兩分天下，有傳韓廠Samsung會喺3月推出Galaxy S7，呢個消息源自某內地電訊商，佢哋喺活動上用Slide Show列出下年新品推出時間表，3月份就寫到明有「三星S7」；Samsung曾經多次喺手機界大展Mobile World Congress上發布新旗艦機，今年MWC正正喺2月尾開幕，時間上都脗合喎！

Mobile Payment登陸可期

流動付款（Mobile Payment）係近年各大廠商落力發展嘅項目，好似Apple Pay已經可以喺英美等地用到，早半個月，Apple仲宣布與銀聯合作，只要完成相關測試及取得認證後，2016年初就可以正式於內地推出，估計香港用家都不必久等！與此同時，Samsung Pay亦會於來年進軍中國、英國等不同地區，加上Google新推出嘅Android Pay，預計出年梗有一款流動付款登陸香港，出街唔帶銀包都得。

達人之言

三禾電氣店長Simon：「我覺得iPhone 7外形上會有大改變，特別是相對龐大的iPhone 6、6s Plus，相信可以更薄更輕；我就不太相信會有太多花巧功能，反而有可能推出4吋屏幕的機款，因為外國對體積較細的手機有所偏好。Galaxy S7的方向應該都集中效能升級，估計可能沿用S6的玻璃、金屬物料，亦會繼續加入彎芒。而流動付款是全球走勢，不少國家例如英、美、日本更加實行多時，只要安全性提高之餘，亦提供更多付款方式，例如增值金額可連同電話月結單繳付，要普及非難事。」

影像篇：Nikon無反出招

Mirrorless近幾年可謂壟斷相機界，Olympus、Panasonic、Fujifilm等廠商都新機頻頻出，反觀相機界「大佬」Nikon嘅Nikon 1系列唔係太積極！日前就有消息傳出Nikon有意收購Samsung NX技術，Nikon可能將NX及自家技術再研發出全新無反系統，又或者與Samsung合作推出無反相機，姑勿論點玩，單係兩大品牌聯手，都已令影友期待萬分。而Nikon亦會於CES 2016上有重大發布，幾日後自有分曉。

8K拍片不是夢？

今年相機拍片升級重點主要集中喺解像度，幾乎紛紛提升至4K。隨着Samsung、LG、Sharp等廠商都推出8K（解像度7,680×4,320）電視，以至YouTube都支援8K影片，8K相信將會成2016年相機嘅發展方向。8K影片現階段屬於試驗性質、專業級拍攝，來年應該就會出現Consumer級別的單反、無反相機，拍片質素又會令人驚喜。

達人之言

Dcfever網站總編輯Jeffery：「個人覺得Nikon收購Samsung NX或者合作機會唔高，因為大部分Samsung相機技術Nikon都做到，反而有機會係技術轉移，所以我估計CES 2016之上，Nikon會推出旗艦單反機D5。今年Full Frame無反市場大熱，若然Canon或者Nikon有新品推出的話，肯定係惹起大回響，但大前提是新機有可能影響旗下單反銷量。我希望下年有更多大感光元件細機出場，如果對焦速度夠快，肯定有一定市場；亦期待Olympus推出大感光元件相機，應用現有Pen系列的對焦系統、防手震等技術，效果應該不錯。」

玩味篇：VR瓣數多有機擔正

VR（Virtual Reality、虛擬實境）一字相信大家都聽唔少，單計VR眼鏡已經有Google Cardboard、Oculus Rift，以及同樣出自Oculus手筆嘅Gear VR，仲有HTC Vive、PlayStation VR等等。今年VR眼鏡主要用途都係睇片，喺技術愈來愈成熟下，2016年VR應用同埋功能都肯定更廣，就以PlayStation VR為例，將會支援《真．三國無雙 7》、《Final Fantasy XIV》等大作，玩法肯定估你唔到，郁郁頭、揮揮手打機試過未？

無線充電普及有望

歷年都出現過唔少支援無線充電技術嘅手機，不過由於裝置、制式局限，談不上普及。2016年局面或有轉變，由AT&T、Intel、Duracell、MediaTek、Qualcomm、Samsung等二百個國際品牌廠商組成嘅AirFuel正式成立，旨在推廣無線充電技術。有各大硬件、軟件廠商力撐，支援無線充電嘅裝置及配件相信會更有系統、更多種類，第二時充電唔使再插線、拔線，點講都方便。

持續變種智能錶

Fossil、TAG Heuer等傳統手錶廠商都於今年推出Android Wear，足證智能手錶有幾Hit。智能手錶設計固然重要，但都要有新功能先可以突圍；預計2016年將會有更多搞鬼智能手錶登場，當中雙屏幕嘅Lenovo Magic View、具備投影功能嘅Ritot都可能係發展方向；前者可以於副屏幕睇到地圖等複雜資訊，後者更可以於用家手上投影出不同內容，有效解決智能手錶屏幕太細嘅問題。

達人之言

香港資訊科技商會榮譽會長方保僑：「VR產品成功與否，視乎軟件配合，好在寫相關Apps的團隊比以往多，內容可望更豐富。無線充電要顧及充電速度及電源輸出，睇番AirFuel Alliance，不難發現有晶片商參與，估計未來無線充電將會似NFC般加入於智能裝置的晶片內，配合在例如咖啡店等地點擺設相關充電器，肯定會瞬間普及。新一代Apple Watch功能、外觀上變化當然令人期待，但整體智能手錶發展確實去到樽頸，功能太多、太複雜反而未必適合用家，要靠外形、設計取勝。」

音樂篇：高清無線異軍突起

2015年，DAP、Hi-Res可以話係流動聽歌嘅關鍵字；當有線發展成熟之後，自然會輪到無線制式；今年就有Sony研發嘅LDAC編碼技術登場，將傳統藍芽技術傳輸頻寬328kbps，大幅提升至990kbps，毋須降頻都可以完美傳輸24bit/96kHz高解像音樂。雖然技術提升，不過就只係Sony產品「獨家村」；估計來年將會有廠商研發出同樣聽到Hi-Res音樂嘅無線制式，將無線Hi-Res音樂擴展至其他品牌、產品，如果成事就肯定係樂迷福音。

真．無線耳機

以往所謂無線耳機產品，講緊都係耳機與Player之間無連接線。接近2015年年尾，就出現不止一款全無線耳機，左右兩邊耳機都以藍芽無線連繫。隨着藍芽晶片技術提升，估計呢類全無線耳機將會愈來愈多，皆因免除收藏繞線煩惱，夠晒方便。不過大前提要提升電量，否則一樣難以普及。

達人之言

Lyra Media主編Cato Mak：「來年頗大機會出現全新無線高清音樂制式，估計有機會由藍芽官方作出調整。藍芽4.0的頻寬其實足以傳輸高清音樂，不過暫時未開放至音樂播放方面，只需稍作更新即可用藍芽裝置聽Hi-Res音樂。而全無線耳機一定係來年大勢，好似Onkyo等大廠也有相關產品，大家關心的應是耳機體積，因為現時市面上兩款耳機，fFLAT5 Aria One偏大、Earin就偏長，未來的產品要在體積上取得平衡。個人覺得來年突破有可能出自Apple，有傳會取消iPhone的3.5mm類比（Analog）插口，並由數碼插口取而代之。」

文：Vincent

攝（部分）：Fanny