向世界出發Suunto Kailash

去旅行，有乜嘢係必備Gadget？手機、DC定Wi-Fi蛋？答案不一，但小記未來可能帶多樣嘢，就係Suunto最新GPS智能手錶Kailash，佢內置雙衞星導航系統，助用戶記錄路線及建立旅遊日誌，從此一錶在手，即可向世界出發！

Suunto Kailash圓形錶面夠經典，而且闊度達2吋，Boy Size設計合乎潮流！$7,800

提供銅、淺灰、碳黑及白色，四款售價相同。

錶側特設「7R」按鍵，按一按便能查看各式旅遊資訊。

內置雙衞星導航系統，能準確測度所在位置，並顯示相關2D地圖。

能查看到過嘅城市或國家數目，環遊世界必備！

專用App《7R》能綜合處理飛行次數、行程里數、外遊日數等資料，方便重溫。

程式內置心理測驗，測試用戶探險基因，小記就有89%，不妨同朋友玩玩！

可記錄酒店等位址，助回程時快速找路。

此錶亦對應《Suunto Movescount》，用戶經此便能分享個人遊歷路線。

取名自聖山

芬蘭Suunto向來主打山系運動型手錶，旗下嘅Ambit、Traverse、Essential系列叫好又叫座，只不過並非人人都係山野好手，服務對象未免太過單一。有見及此，品牌早前發表全新系列World Collection，顧名思義以旅遊人士為客戶群；而Kailash正是系列首款產品，名字取自西藏聖山岡仁波齊峰（Mount Kailash），寓意世界中心，齋講已叫人肅然起敬！

遊蹤全記錄

外形上，用過Suunto錶會覺熟口熟面，經典圓形錶面、藍寶石水晶玻璃鏡面、太空級數鈦金屬外框，加上玻璃纖維複合物料機殼，講真，新鮮感一般，但係舒適、堅固、防花、耐用，大家仲可以投訴啲乜？而且有齊銅、白、淺灰及碳黑四色，選擇比同門Traverse豐富。新錶另一賣點係首配右側「7R」按鍵，佢有人類探險基因「DRD4-7R」嘅意思，只消按一按，便能查看旅遊城市、飛行次數、行程里數、外遊日數等數據；用戶甚至可透過《7R》手機程式建立個人化探索日誌，畀人「葡萄」閣下足迹，呃Like至啱！美中不足係《7R》程式暫時只有iOS版，期待日後推出Android版本。

雙衞星導航

一如同廠出品嘅頂級型號，Kailash配備GPS及GLONASS雙衞星導航系統，能夠準確測度及記錄所在處嘅GPS位置，一旦遠離即會顯示兩地距離，方便旅行人士快速搵路，設計細心。其他功能包括衞星時間更新、日常計步、100米防水等，而一系列實用工具，諸如高度計、氣壓計、指南針、日出及日落時間等都有，而且開啟GPS後夠用十日，去一轉長Trip都唔使叉電！唯一要彈就係LED屏幕雖有省電之效，但單色文字略嫌清晰度及銳利度不足，睇慣彩色智能錶，要時間適應。