提起異形，大家一定諗起電影中嗰隻「口中有口」、核突惡心嘅外星生物，係人見到都要搵路走！不過凡事有例外，其實異形都有性感誘人嘅一面，引到男生眼定定唔願走？筆者講緊嘅係由本地漫畫家林祥焜（長棍）與Hot Toys聯乘合作嘅Alien Girl，將長棍最擅長嘅超性感美少女畫風與異形Crossover，唔只立體化，效果仲出奇咁和諧，無論宅男或者異形嘅Die Hard粉絲，點可以冇？

Alien Girl為獵殺異形而生，Alien Queen都慘成槍下亡魂，精心打造嘅地台做到畫龍點睛。

Alien Girl由長棍擔任人物設計，將日系美少女畫風與美式異獸完美結合。

頭顱採用半透明設計，精細之餘，亦擺明向Big Chap Alien致敬。

有齊寫實與漫畫兩款風格頭雕，一次過滿足晒兩班支持者。

豐胸、翹臀、幼臂等身形特色若隱若現，So Sexy！

重型機槍取材自《普羅米修斯》嘅Space Jockey，細節盡現。

背部只保留部分觸鬚，減少不必要嘅生化感覺。

尾巴內置鐵線，但暫時未試到活動幅度，照計應該任扭唔嬲啩。

啱啱搞掂Alien Girl，長棍（右）與Joseph（左）已經期待下次合作，長棍仲大膽假設︰「若果HT搵我搞第三款Hot Angel，我一定會整Robocop。」

長棍執筆　炮製誘人曲線

近年HT嘅Super Hero Figure叫好叫座，難得主腦Howard冇忘本，一年前相約長棍，重啟塵封已久嘅Hot Angel系列，長棍回憶說︰「Hot Angel嘅第一炮She Predator係用鐵血戰士做藍本，今次就輪到死對頭異形。Howard要求我加入美少女元素，但又唔可以過分暴露，所以Figure嘅豐胸、翹臀、幼臂都若隱若現，注重性感與線條美，務求誘發玩家嘅性幻想！」

異形金像設計大師H.R.Giger去年離世，Alien Girl嘅推出甚有致敬味道，為咗表達異形嘅招牌怪異設計，HT搵嚟本地知名嘅生化造型師Joseph Tsang負責雕塑，將半透明頭顱、凹凸外皮等異形特徵一一仔細還原，Joseph表示︰「最難整係條腰，由於空間太窄，要兼顧美觀與可動性，我同長棍都改過好多次，好彩出嚟嘅效果大家都滿意！」他補充說，Alien Girl嘅背部只係保留部分觸鬚，藉此減少外皮不必要嘅生化感，換番多啲女性美。

破格雙頭雕　風格大異

採訪當日，Figure仍屬試辦階段，關節位仲要再作修改，所以可動性依然成謎，唯一肯定係尾巴內藏鐵線骨架，配合異形母后（Alien Queen）嘅情景地台，玩家可以盡情「鞭屍」！頭雕方面就由「台灣之光」嘅Viva Lai主理，仲一次過做咗兩款，一款跟足長棍筆下嘅漫畫風格，另一款模仿真人面相，同時滿足晒漫畫風與寫實派兩種玩家。不過配件分量實在少，只有四款造型手掌及一把重型機槍，後者取材自《普羅米修斯》嘅Space Jockey，神似之餘又大大把，一件頂幾件，當扯平啦！

零售價︰$1,680

預訂價︰$1,630

推出日期︰明年第三至第四季

銷售點：旺角彌敦道582-592號信和中心20樓Secret Base

查詢︰3722 3988

＊圖片所示仍屬產品原型，與最後完成產品或有少許分別。

文︰Gilbert　攝︰Homan