AQUOS Crystal 2 無邊新意

今期科技界熱話當然係《競爭條例》實施，搞到全城手機大劈價！不過行貨機近排新意欠奉，想有新花臣手機送畀男女神，剛剛空運到港嘅日系AQUOS Crystal 2就Good Fit。佢繼續系列招牌作「無邊框」特色，設計超有型，加上一系列「Grip Magic」邊框感應功能，送禮自用都「得睇」！

AQUOS Crystal 2有「無邊框」感覺，睇相、睇片效果超正。$3,680

上、左、右邊框都激窄，靚絕手機界！預載Android 5.0作業系統及「Feel Home」介面，整體操作順暢。

機背備有800萬像素鏡頭及LED燈。

機背呈弧形設計，手感唔錯。

特別提供「Swipe Pair」功能，將兩部Crystal 2合併變成超大畫框顯示靚相。

支援Mini Apps功能，可以透過小視窗同時開啟指定程式。

內置多個拍攝模式，玩味十足。

新增「Grip Magic」功能，可以透過機側兩邊感應器啟動指定功能，例如有來電時立即調低鈴聲音量。

顯示三原色鮮艷奪目

Sharp嘅AQUOS Crystal、Crystal X手機都成為市場熱話，更可以話係「無邊框」手機嘅標準。嚟到新一代Crystal 2，機身上、左、右三邊闊度依舊僅得大約2mm，加上機面玻璃邊緣以斜面切割，喺光線折射下，邊框睇落更窄，營造出「無邊框」嘅感覺。雖然此機嘅5.2吋屏幕解像度僅得720p，但就採用廠商新研發嘅「S-Pure LED」，顯示三原色時更加鮮艷奪目，視覺效果出色。AQUOS Crystal 2仲內置「Quality Mode」，提供「Dynamic」、「Natural」、「Relax」等五款顯示模式，屏幕會自動調整色溫，無論睇網頁抑或睇相片，雙眼時刻都睇得舒適。

Grip Magic利單手操作

邊框贏盡收視之外，今代仲引入「Grip Magic」功能，特別於機身左右邊框加設感應裝置，例如當用家手握機身時，就可以亮起屏幕，有來電時可將鈴聲音量即時收細，又或者暫停屏幕自動旋轉，單手已經可以操作到，用落都幾方便。此外，AQUOS Crystal 2仲提供唔少貼心功能，包括於畫面以小視窗開啟另一程式嘅「Mini Apps」、掃邊框Cap芒嘅「Clip Now」等，而且仲可以One Touch縮細整個畫面，方便單手操作。硬件方面，採用Qualcomm Snapdragon 400四核心處理器、2GB RAM以及16GB ROM，規格合格，亦有日系機常見嘅IPX5/7防水防塵標準。令人驚喜係其800萬像素鏡頭相片質素不俗，而且仲提供「Manual」（手動）、「Monochrome」（黑白）、「Time Laps」（縮時攝影）等多個拍攝模式，好玩又實用。