24支入圍明年歐洲國家盃嘅參賽名單已經塵埃落定，上個禮拜仲做埋分組抽籤，你覺得邊隊最有冠軍相？最熱之選，冇理由唔係西班牙同德國啩！前者係上屆冠軍，今屆矢志再衞冕，後者去年贏咗世界盃，勢頭咁好，當然唔好畀佢停，最重要係兩者嘅實力，的確稱得上係大熱中嘅大熱。身為呢兩隊波嘅粉絲，唔使等到明年六月開波先至買波衫撐場，2015都未過，adidas已經將兩隊嘅新波衫搶閘上架。

西班牙 2016主場 adizero球衣 $1,099（另有Climacool售$629）

為咗減輕重量，adizero嘅隊徽由Climacool嘅繡章變成熨章，薄身好多。衣領上嘅紅黃相間，正係西班牙隊徽嘅代表顏色。

衣領上嘅紅黃相間，正係西班牙隊徽嘅代表顏色。

衫身表面壓印嘅三角圖案，象徵咗西班牙最擅長嘅Tiki-Taka踢法。

衫袖有齊西班牙主場服飾一向所用嘅紅、藍、黑三色，仲有紅、黃、紅三角圖案。

西班牙2016作客 Climacool球衣 $629

德國 2016主場 Climacool球衣 $629

德國隊波衫暫時只有Climacool到港，隊徽用咗繡章款式。

作為應屆世界盃盟主，所以衫身正面中間多咗個紀念金章Show Off一番。

領位有代表德國國旗嘅黑、紅、黃三色幼間外，仲有清清楚楚嘅「GERMANY」字樣。

衫身正面中央嘅直間，其實係一條滿載光輝戰史嘅Bar Code。

左、右兩邊衫袖嘅數字，分別係贏世界盃與歐國盃嘅年份。

adidas Beau Jeu　$1,199

作為2016歐國盃嘅Official Match Ball，當然要加番個大會賽事Logo作為憑證。

鬥牛兵團　無敵三角陣

雖然西班牙喺去年嘅世界盃表現令人大失所望，但係呢支鬥牛兵團依然實力強橫，喺外圍賽C組就以9勝1負27分嘅成績首名出線，入23球而只失3球，如果有睇過呢幾場波嘅球迷就會發現，西班牙最擅長嘅Tiki-Taka三角短傳踢法唔只冇退步，而且有更多變化，新波衫就以此為題，波衫表面壓印咗多個三角圖案，象徵Tiki-Taka。另一方面，西班牙嘅全套主場戰衣配套回歸傳統，衫、褲、襪分別用咗紅色、藍色及黑色，所以衫袖上就有藍黑雙色嘅橫間以作呼應。至於作客款式大膽得多，以白色為主，三角圖案唔再工整化遍布喺衫身表面，而係不規則地集中喺心口位置，而且唔用壓印，而係用代表西班牙嘅紅、黃雙色直接印上，清清楚楚Show畀你睇。留意作客款式只有Climacool球迷版輸港，而主場就有齊adizero落場版與Climacool，球迷揀衫要認實了。

日耳曼中興　乘勝追擊

相隔24年，德國隊終於喺去年重奪世界盃，計計數，佢哋上次贏歐國盃亦都已經係19年前嘅事，換轉你係德國隊嘅一分子，當然雄心萬丈想再下一城啦，況且以佢哋現時嘅人腳及狀態，的確大有條件贏埋嚟緊嘅歐國盃。想為德國隊打氣，最好方法莫過於想當年，新主場波衫嘅正中間，有一道類似直間嘅暗紋，原來係一條巨型Bar Code，記載咗德國隊過去贏過嘅冠軍紀錄，另一方面，左邊衫袖繡上「54-74-90-14」嘅數字組合，正係佢哋贏世界盃嘅年份，右邊嘅「72-80-94」就係歐國盃得獎年份。除此之外，唔只西班牙及德國，亦都唔只主場及作客，但凡adidas旗下嘅多支歐洲國家隊嘅新波衫，沿用多年嘅衫袖三間唔見咗，三間條紋移位到兩腋之間，呢項改動都咪話唔大膽，對於adidas Football嘅忠實支持者而言，又睇唔睇得慣先？

銷售點︰尖沙咀漢口道17號adidas旗艦店

查詢︰2730 0517

與民同樂　Beau Jeu星級球感

除咗波衫，adidas亦同步公布咗明年歐國盃嘅專用足球─Beau Jeu。呢個新波歷時18個月研發而成，藍、白、紅三色正係法國國旗嘅代表顏色，球體表面有多組粗體圖案，將E-U-R-O和2-0-1-6結合其中，而「Beau Jeu」之名可以譯做「The Beautiful Game」，寓意2016歐國盃會成為一屆精彩賽事。Beau Jeu係以2014世界盃嘅Brazuca為開發基礎，重點提升摩擦力與辨識程度，早前已經有多位球星試用，當中包括西班牙嘅卡斯拿斯（Iker Casillas）及威爾斯嘅巴利（Gareth Bale），依家新波亦已登陸香港有售，就算你我他呢啲凡夫俗子，依家都可以提早感受到歐國盃嘅魅力了。

銷售點︰旺角通菜街63-65號adidas Football Store

查詢︰2527 0217

文︰Dick

攝︰Chris、Fanny、Bowie