原力覺醒，就在今天，身為超級星戰迷，點只要買飛入場，少不免仲要買番啲Hasbro嘅3.75" Figure做珍藏，咁先算Die Hard嘛！3.75" Figure嘅賣點，唔只資歷厚、易收藏，最過癮係可以夾埋相關嘅Vehicle一齊玩，令玩家可以更大陣仗重演一幕幕嘅星戰場面。就趁EP7今日上畫，Hasbro趁勢推出新版「千歲鷹」Millennium Falcon，跟埋3.75"系列嘅Finn及Chewbacca，仲有埋內籠設計，以及發聲與發射功能，點只Kidult，就連小朋友見到都會原力覺醒啦！

Hasbro Star Wars：The Force Awakens Millennium Falcon 建議零售價：$1,199.9

隨盒附有三個3.75”系列Figure，由左至右分別係Finn、BB-8及Chewbacca，留意Finn及Chewbacca係特別版，多咗機師專用嘅通訊器及喉管。

機身尾部可以揭開，Show到內裏嘅客廳與床位等間隔。

機身頂部中央可以升起防空炮座，裏面仲放到一個Figure充當炮手。

駕駛艙可以揭開，放入Finn及Chewbacca，不過空間窄咗啲，唔似Boxart官圖坐得咁自在。

Hasbro嘅出品一向玩味行先，細緻度唔可以要求太高，不過新版千歲鷹喺雕工與塗裝上都有意外驚喜。

Hasbro Star Wars：The Force Awakens First Order Special Forces Tie Fighter 建議零售價：$1,699.9

打開駕駛艙嘅頂部，就會見到內裏布局都幾細緻。

駕駛艙右上方多咗一對機炮之餘，底部亦都多咗一個可以水平旋轉嘅雙聯裝炮座。

由於係雙座機關係，駕駛艙前後都有透明屏幕。

隨盒附有一個機師Figure，由於係The Black Series系列，屬於6” Figure類別，做工細緻度當然高過3.75”版本。

自從星戰面世，唔只喺電影界引發出宇宙大爆炸嘅威力，對玩具界嘅衝擊亦都猶如投擲核彈頭咁勁，要數當中最有代表性、最普及嘅玩具，首推3.75" Figure，最初由Kenner喺1978年起推出，結果大受歡迎，事關細細隻，價錢又夠晒親民化，而且幾乎出齊晒所有電影角色，廠方更進一步推出埋相同比例嘅大小Vehicle以及場景Boxset，由收藏價值到玩味都超過傳統嘅12" Figure，去到1991年Kenner成為Hasbro嘅子公司，整個3.75" Figure系列亦改由Hasbro推出至今；無論掛住Kenner或Hasbro牌頭，但凡星戰迷，都一定幫襯過3.75" Figure！（編者按︰Kenner年代嘅星戰3.75" Figure，大部分係「Made in Hong Kong」，所以喺70年代尾、80年代初，喺香港買到嘅3.75" Figure，往往比起歐美地區更快上架，甚至更齊款。）

機關多多 火力Power Up

講番正題，今次嘅新版千歲鷹就對應3.75" Figure系列，造型以EP7為藍本，先以造型論，Hasbro嘅出品屬於玩具性質，精細度似乎唔及收藏級商品，但今次嘅新版千歲鷹畀到大家唔少驚喜，因為機身表面都有唔少凹凹凸凸嘅機械紋理，尤其是機身後部嘅引擎散熱口仲有煙熏效果嘅特效塗裝，同以往嘅Hasbro商品相比，已經講究咗好多。至於隨盒最重要嘅Parts，係男主角Finn及Chewbacca嘅Figure，兩者都係特別版，與原裝版本相比多咗機師專用嘅通訊器及喉管，此外仲跟埋相同比例嘅BB-8。

作為玩具定位嘅Hasbro千歲鷹，唔只大大部（長54cm、闊41cm、高10cm左右），仲有Gimmick多多，例如電影中嘅千歲鷹，火力一向麻麻，但係呢部千歲鷹嘅機頭中央多咗支重炮，可以發射NERF海綿子彈；機身頂部正中央又多咗隱藏式防空炮座。除此之外，Finn、Chewbacca及BB-8並非陪襯，首先千歲鷹嘅駕駛艙可以打開，放入Finn及Chewbacca；機身後半部又可以揭開，內藏客廳、床位及置物地台等多種間隔，除咗Finn、Chewbacca及BB-8，仲可以放埋其他同系Figure入去，重演一班角色喺千歲鷹內嘅生活模樣。至於Hasbro擅長嘅發光與發聲功能，新版千歲鷹亦都有齊。

同步上架 珍寶級Tie Fighter

54cm長嘅千歲鷹夠晒震撼力？未算，同步上架嘅The Black Series First Order Tie Fighter仲誇張，後者對應The Black Series嘅6" Figure系列，所以體積更加大，去到51×54×65cm（長×闊×高）左右，屋企有冇位擺嘅問題，仲頭痛過有冇錢買！呢款Tie Fighter以EP7嘅First Order軍團為設計藍本，好多人以為只係顏色有別，機設同EP4至EP6嘅Tie Fighter一樣，呢部珍寶級Tie Fighter就Show畀你睇並非如此，首先球形駕駛艙嘅右上方多咗一對機炮，至於最大分別係駕駛艙，元祖Tie Fighter係單座機，First Order版本就變成雙座版，前、後各坐一名機師，而駕駛艙背後亦多咗透明屏幕。論噸位，呢位Tie Fighter真係冇得輸，但係論玩味就比唔上千歲鷹，咁大部都冇發光、發聲、發射等Gimmick招數，而且既然係雙座機，但係隨盒只跟一個機師Figure，即係要粉絲另外再補購啦！神級玩具迷會否挑戰自己，買部Tie Fighter番嚟大改一番，例如重新噴油、換銅枝、加LED燈……我係唔係太大想頭呢？

查詢︰2738 8300（Hasbro HK）

文︰Dick　

攝︰Homan