紋身理髮電單車 The 59 Tattoo & Barber Shop

自去年開始，由英式復古文化引伸出來的油頭（Pompadour）熱潮一直未停過，而專門修剪呢類髮型嘅Barber Shop亦愈開愈多，當中由Marcus、Nigo、Mike同Kith 4位共同主理的The 59 Tattoo & Barber Shop，可算是城中最矚目的理髮店。4人各司其職，Marcus及Nigo為Tattoo Artist，而Mike及Kith則為Hair Stylist，而4人之所以經營紋身理髮店，原來竟是源於一部英式復古電單車。

圖1：訪問當日各人均着上英國品牌Lewis Leathers電單車皮褸，仲齊齊話係冬天指定造型。

The 59 Tattoo & Barber Shop整間店舖裝潢圍繞英式復古文化為主。

閣樓掛着一件皮褸，背部印有店主們所屬的電單車會S.R.B.C. 字樣。

店內有齊各種梳油頭必備的髮型用品。

通往閣樓樓梯的牆壁掛滿電單車照片，愛車之情不言而喻。

唔講唔知，油頭起源於18世紀法國國王路易15的情婦龐巴度夫人（Madame de Pompadour），當時流行把頭髮往後梳高，直到50年代開始才伸延到男士髮型上，而貓王（Elvis Presley）可算是此髮型之經典代表。

《The Wild One》及《The Leather Boys》就係英式復古電單車文化的經典電影，愛油頭愛電單車的一定要睇。

問到點解會0係土瓜灣開舖？原來離不開電單車，Mike：「其實我哋最初係因為玩英式復古電單車而認識，跟住就慢慢愛上呢種文化，喺土瓜灣開舖主要係隔籬以電單車作主題的Full Coffee老闆都係我哋嘅朋友，多得他們幫手我哋先租到呢個舖位。」Nigo：「最初我哋都係希望收工可以搵個地方聽吓歌傾吓計聚吓，揀呢度係因為鍾意呢邊比起油尖旺更清靜。我自己擅長的Old School紋身，好多喜歡聽Rockabilly音樂嘅人都會揀呢類圖案，好似Sailor Jerry的水手紋身風格就係當中經典。」

聚腳點變工作坊

作為眾人中紋身最多的Marcus，當初同樣出於找個地方聚腳為主，「我哋幾個因為玩電單車認識，亦係S.R.B.C. 車會成員，最初經常為出街無位泊電單車而苦惱，諗諗吓大家就決定搵個地方將紋身、油頭同電單車3種元素結合，坦白講，開店之初都係為滿足我哋自己先，但做耐咗發現原來有唔少人同我哋一樣喜歡呢類文化。」Kith亦表示：「自4、5年前接觸英式復古電單車，我哋已經沉迷呢種復古文化，最初都係當呢度係工作坊，不過我同Mike的正職都係髮型師，所以來找我們剪油頭以預約為主。」現時除了Marcus、Nigo、Mike同Kith四位外，店內還有唯一女將Julian擔任髮型師，為各位男生操刀剪油頭，「雖然油頭比較適合男生，但如果女生喜歡英式復古文化的話，可以嘗試一些Pin-Up Girl造型或者Victory Rolls髮型，《The Wild One》同《The Leather Boys》呢兩套電影入面的造型都好值得參考。」

About : The 59 Club

店名稱作The 59 Tattoo & Barber Shop，當然與歷史有關。1959年4月2日於英國倫敦成立的The 59 Club，最初只是一個英國教會的青年人俱樂部，當時俱樂部所舉辦的音樂晚會亦有影星如Elizabeth Taylor等參與，並逐漸成為一眾電單車騎士的聚腳地，而為人所熟悉的就係於1968年時The 59 Club首播了一直被禁的鐵騎士經典電影《The Wild One》，值得一提的是The 59 Club成員大多是以Rockers為主，但同時亦有少量Mods為成員，雖然兩者同樣圍繞電單車文化，但無論在衣着造型以至所駕駛的電單車款式都有明顯分別，基於60年代Rockers與Mods呈現對立狀態，所以The 59 Club亦分別於倫敦西面Paddington教會及東面原址Hackney Wick為兩者舉行聚會，以減低雙方爆發衝突。