仲有四日，大家等到頸都長嘅《Star Wars: The Force Awakens》就喺香港上畫，你又準備好未？作為星戰迷，其實戲未上已經先興奮，因為形形色色嘅星戰新品已經搶先登場，好似Hot Toys早喺今年夏天開始，已經相繼發表咗Kylo Ren、First Order軍團嘅Captain Phasma，以及當中嘅多款「白兵」兵種，不過數嚟數去，個個都係奸角嚟嘅；終於喺上畫前嘅一個禮拜，HT發表咗首款EP7嘅正派角色，就係喺Trailer中經常同BB-8喺埋一齊，背景依然神神秘秘嘅「謎女郎」Rey。

無論MMS336或MMS337嘅Rey都備有兩款造型，分別係露面Look與蒙面Look。

Rey嘅武器只有兩種，分別係手槍及長矛。

或者Figure嘅表情太正經，令早已被Trailer先入為主嘅粉絲覺得陌生，其實以做工而論，由Jong-hyuk Park雕刻、J.C. Hong塗裝嘅Rey頭雕，喺五官輪廊上已經交到貨，留意瞳孔就跟足真人用咗Hazel Eye色調。

雖然唔識遙控周圍走，但HT BB-8就以雕工及塗裝取勝，亦都還原電影中嘅滾動式球體機械人結構，據知正式派貨時，眼仔仲有LED發光功能。

睇番劇照，Daisy Ridley高額、略呈國字臉嘅面相特徵，都喺HT 1/6版本重現出嚟。

除咗露面及蒙面，其實Rey喺Trailer之中都出現過介乎兩者之間嘅第三造型，唔知HT有冇考慮追加呢？

喺早前嘅Toy Soul發布會上，HT展出咗Rey試辦實物，坦白講，比官圖更加似樣。

EP7嘅保密工夫真係做得好足，好似女主角Rey，雖然喺唔同版本嘅Trailer都有登場，但係來自何方、識唔識用原力、去Jakku搵乜、點解會畀Kylo Ren用光劍脅持、Han Solo又點解畀支手槍佢傍身，甚至連姓乜都仲未公布，充滿神秘感。筆者只知飾演Rey嘅Daisy Ridley係一個年僅23歲嘅英國演員，睇落身形嬌滴滴，其實身高都有170cm，已經比EP1至EP3由Natalie Portman飾演嘅Padme Amidala高咗10cm，最緊要係就算有少少包包面，但五官精緻又充滿少女Feel，喺Trailer之中已經好吸引，今次HT將佢化身1/6 Figure又如何？

神似與否有古講

睇到HT啱啱發表嘅官圖，總係覺得同Trailer嘅Rey有啲出入，有唔少粉絲都喺Forum留言，有人話頭太大，亦有人話太過大眼仔，又有人話真人面珠好白滑，Figure反而有過多毛孔斑斑……筆者早前喺Toy Soul發布會睇過實物，老實講，實物比官圖似樣好多，以上提到嘅問題，喺實物身上真係唔多覺，或者係攝影角度嘅問題啩。不過，筆者都同意1/6 Rey同Trailer中嘅樣子，的確存在距離，問題並唔係雕工、塗裝準唔準確，輪廓像真度高唔高，而係表情，睇番Trailer，Rey出現過徬徨、焦慮、疲倦，以及逃跑中既緊張又驚怕嘅表情，反而Figure所用嘅標準正經Look，似乎喺Trailer之中唔多見，難免令粉絲覺得陌生，或者當大家入場之後，見多Rey幾面，睇到佢更多嘅表情變化後，就會接受得到。另一方面，好多玩家都有同一個疑問，就係點解唔用織髮？筆者問過HT嘅有關專員，原來Rey嘅髮型有兩點不利織髮，其一係臉頰兩旁都有長長嘅髮鬢，其二係後尾枕有三個髮髻，想持久Hold住髮型嘅話，用番主流嘅頭雕製作比織髮穩陣得多。

BB-8像真度取勝

到底HT 1/6 Rey過唔過到你嗰關，見仁見智，不過同步發表嘅BB-8就好難有挑剔位，雖然佢唔似Sphero出品有電動遙控「行走」功能，不過相比之下，HT版本就有更深刻嘅機械紋理雕工，又多咗舊化塗裝，更加切合BB-8喺沙漠星球Jakku同Rey一齊冒險嘅劇情，反之Sphero嘅外觀光滑得多，傾向玩具化；論玩味，揀Sphero，要求像真度嘅話，揀HT。而且HT版本亦非單純嘅景品，BB-8嘅最大特色，就係下半身嘅球體可以前後左右滾動，但係作為頭部嘅半球形永遠維持喺正中央，HT就利用強力磁石與不倒翁嘅自動平衡裝置，還原呢項Gimmick設計，無論大家點樣轉動下半身嘅球體，頭部都唔會走位，眼仔仲有LED發光功能。今次HT就準備咗兩款1/6 Rey Boxset，一款只有Rey，另一款就連埋BB-8，換句話說，想要BB-8嘅話，就要連埋Rey一併幫襯。

＊圖片所示仍屬產品原型，與最後完成品或有少許分別。

文︰Dick（圖片由Hot Toys提供）