正如當年李麗珊贏咗奧運金牌後講過︰「香港運動員唔係垃圾」,就算喺香港發展體育嘅土壤係幾咁貧瘠,但係我哋嘅運動員一直都好爭氣,更有幸者,係唔少外國教練唔怕迎難而上,同我哋嘅運動員一齊默默耕耘,「Kim Sir」金判坤固然係表表者,其實長跑界亦有東瀛高人村尾慎悅助陣。早前ASICS喺K11開新舖,邀請到村尾老師做嘉賓,除咗向我哋分享日系跑鞋嘅特色外,仲講出佢對香港跑手嘅一個夢。

村尾教練手上嘅舊款ASICS跑鞋,曾經幫過唔少日本馬拉松選手喺80年代做出驕人成績;依家村尾先生擔任港隊嘅客席教練,佢好希望香港選手早日破到當年紀錄。

以ASICS鞋款為例,村尾教練推薦Kayano與GT系列畀初學者,因為保護性較強,Tarther亦係佢嘅心水推介;至於日本嘅精英級跑手,唔少會用Sortie比賽,可惜香港暫時未有入口,不過亦可改用教練手中嘅Tartherzeal TS 4。

ASICS的K11新店已經開幕,主打跑步產品,有齊新手與高手、練習與比賽等多項鞋款。

初階之選
GEL-Kinsei 6
$1,650

品牌標誌性嘅GEL緩震技術,為跑手提供十足保護。

FluidFit網布鞋面彈性高,貼腳之餘又唔會侷促。

高手拍檔
GEL-Hyper Speed 7
$750

無縫網面可以減輕重量,網布物料就可加強透氣作用。

除咗鞋面,DuraSponge鞋底亦有透氣孔,再度提升舒適效果。

早前新店開幕當晚,亦都舉行咗ASICS Running Club HK嘅第一課,初試啼聲喺尖東跑咗5km。

村尾教練係何許人也?呢位長跑教練擁有逾30年嘅「教齡」,門生滿天下,當中包括1987年世界田徑錦標賽、89年倫敦馬拉松、90年英聯邦運動會及紐約馬拉松冠軍Douglas Wakiihuri,喺1997至2004年擔任日本國家隊教練,之後去過唔少國家執教,去年起獲邀擔任港隊客席教練,自此經常港日兩邊走進行教練工作。村尾先生被唔少人視為「魔鬼教練」,皆因佢嘅訓練量真係唔講得笑,不過唔係咁教,又點幫到姚潔貞爭取到明年奧運嘅女子馬拉松參賽資格?

日本人愛馬拉松 又要跑又要睇

今次村尾教練獲邀成為ASICS新店嘅開幕嘉賓,訪問時見到教練帶咗一對好Old School嘅ASICS跑鞋,唔通ASICS玩復刻?非也非也,村尾教練說︰「呢對鞋已經係30年前嘅產物,同依家嘅高科技跑鞋當然冇得比,但係當時着住佢嘅日本選手,只需2小時10分鐘內就完成到一個馬拉松賽事,反觀香港選手嘅紀錄,到依家都未有人做到呢個成績,唔通要着番呢款鞋先破到紀錄?其實我嘅意思,係依家有咁多咁先進嘅鞋款推出,都未有香港選手做到呢個成績,究竟問題出喺邊?我帶埋呢對鞋嚟香港,好想傳達一個訊息,就係希望早日有香港選手破到呢個紀錄。」(編者按︰瀨古利彥喺80年代嘅福岡、東京、芝加哥及波士頓馬拉松,都以2小時10分鐘以內嘅成績奪冠。)

日本嘅長跑文化比香港起步早,亦都更加興盛,其實原因何在?村尾教練解畫︰「兩地之間嘅最大分別,就係日本有電視直播馬拉松賽事,日本人唔只鍾意長跑,亦都鍾意睇長跑節目,每逢11月到3月都係日本嘅長跑旺季,每星期都會播放唔同嘅比賽節目,喺全世界之間,唯獨日本可以藉觀賞長跑節目,令更多人愛上呢項運動。」

ASICS落戶尖咀 雙線新鞋進駐

日本唔只長跑文化興盛,仲有大量出色嘅跑鞋產品,而且特別適合亞洲人使用,村尾教練道出原因︰「因為ASICS嘅跑鞋,最初係專為日本人設計,而亞洲人與其他同區人士相比,彼此嘅骨骼有明顯分別,所以ASICS嘅鞋款特別適合亞洲人。其實依家ASICS已經開發咗更多鞋形,正常、闊身、窄身嘅都有,歐美用家都會揀到合適嘅ASICS型號。」就趁新店開幕,ASICS HK亦都火速引入咗唔少新鞋款,以初心跑手為例,心水推介就有GEL-Kinsei 6,專為練習而設,前後掌嘅中底都用咗GEL,提供十足嘅緩震效果,至於FluidFit網布鞋面,彈性高,做到貼腳而唔夾腳,而外底採用AHAR高耐磨橡膠製成,就算練習量再多都唔易報銷。同步上架嘅GEL-Hyper Speed 7就專為高階跑手而設,用嚟應付長距離練習及比賽,設計原則係以輕量化換取速度,無縫鞋面夠輕、夠簡潔,而後掌內藏GEL,DuraSponge專利鞋底有助加速之餘,仲設有透氣孔,連同Magic Sole鞋墊加強透氣能力,專業得嚟又舒服。

周五齊齊Run

近年嚟,唔少運動品牌都會開辦自家嘅跑步班,吸引對跑步有興趣嘅人士成為品牌粉絲,ASICS都唔例外,就趁新店開幕成立咗ASICS Running Club HK,由本月至明年2月26日期間,逢周五喺本港唔同地區進行長跑練習,每次為時1.5至2小時,歡迎跑步發燒友參加,名額只有50位,先到先得,報名要快,詳情可以到ASICS HK嘅Facebook專頁瀏覽。

銷售點︰尖沙咀河內道18號K11 G36號ASICS專門店

查詢︰2739 9633

文︰Dick

攝︰Paul