「撒亞人，生於這個地方，稱呼叫悟空……」無論係80後或90後，甚至70後，相信大家都唔會對呢幾句歌詞陌生啩，想當年嘅你我他，誰未試過星期六捱到凌晨唔瞓，就係為咗追無記播《聖鬥士星矢》、《龍珠》同《幽遊白書》？要數《龍珠》中最震撼、最令人難忘嘅畫面，悟空首次變身超級撒亞人呢一幕，肯定冇得輸，從此開創出「超級撒亞人」嘅新紀元。如此經典一幕，SHF最近就將佢實體化，實行以集體回憶化為吸金必殺技。

隨盒備有三款面相組件，與五年前嘅同系孫悟空超級撒亞人版本相比，多咗右圖嘅咧齒Look。

SHF超級撒亞人孫悟空 超戰士覺醒Ver.
建議零售價：¥5,200

可動性高係SHF嘅優良傳統，無論出拳或起腳，都可以輕鬆做到。

可動性高係SHF嘅優良傳統，無論出拳或起腳，都可以輕鬆做到。

KO菲利經典造型

其實早喺五年前，SHF已經出過孫悟空嘅超級撒亞人版本，今次嘅新版本又有何分別？新版本名為「超戰士覺醒Ver.」，顧名思義選用咗悟空VS菲利時第一次變身嘅人設，最大特色係當時嘅悟空打到爛身爛勢，罕有地要赤膊上陣，露出雙臂、膝頭，以至上半身嘅健碩肌肉，同以後次次都着得整整齊齊嘅造型相比，顯得截然不同。今次SHF就忠實還原呢一幕，胸肌、背肌、腹肌、三角肌以至二頭肌等唔只現晒形，喺肌肉紋理上仲有深淺色塗裝強化爆肌效果，加埋衣衫襤褸，而腰帶及膝頭仲設計成隨風飄起嘅形態，夠晒入戲。更抵讚係造型如此大變化，但依然保持高可動性，出拳、起腳、批肘，以至龜波氣功等甫士都做得到。

同步必入Energy Aura

至於附件方面，悟空一向都係打拳頭交，大個仔之後連如意棒都冇用，今次嘅SHF當然唔會有武器跟身，造型手掌方面，左右手各有五款，包括握拳、鷹爪、虎爪及開掌等唔同姿勢，足夠對應唔同招式需要；面相組件就比五年前嘅同系舊版本多咗一款，保留正常Look與憤怒Look之餘，今次多咗咧齒Look，總算多咗啲表情變化。除此之外，與今次SHF同步上架嘅仲有「魂Effect」Energy Aura特效組件，備有黃色及藍色兩款選擇，黃色嗰款就最夾今次嘅「超戰士覺醒Ver.」，用嚟做背景，就可以傳神擺出悟空儲氣嘅招牌甫士，鍾意影相嘅玩具迷，執相時可以慳番大把Key背景嘅工序啦！

查詢︰2433 1828（瑞華行）

文︰Dick

攝︰Chris