韓潮爆發，韓星喺香港嘅風頭已經蓋過東瀛，其實成為潮流「尖啄」嘅，仲有時裝、化妝品，以及作為高階消費品嘅汽車，你唔發覺近幾年嘅韓國車，造型都In咗好多咩？唔似以前咁平實，老土，個人認為喺外形設計上，甚至大膽過唔少日本車，至於價廉呢個優點依舊不變，難怪唔少揸開日本車嘅用家，都會轉投韓國陣營，例如啱啱抵港嘅現代（Hyundai）Santa Fe，又會唔會令你心思思想轉軚？

座椅承托力足，質素媲美歐洲車款。

論乘坐空間嘅寬敞程度，就以中排最可觀，而且可以整排，或者局部收起。

中控台以4.2吋屏幕為核心，附近設有唔少按鍵，操作起嚟要花啲時間適應。

雙圈式儀錶板加上遮光罩，陽光再猛都冇有怕，不過會唔會太大件呢？

留意波棍台前面設有儲物格，以便放置碎銀、鎖匙或八達通等小型物品。

Santa Fe Facelift唔只性能可靠，耗油量亦算低水平，只有8.5L/100km。

車尾置物量實在一般，行李又大又多嘅話，先要收起後排為妙。

2.4L直四引擎嘅188ps馬力輸出，香港使用綽綽有餘。

尾燈採用橫向式設計，線條布局層次分明。

大天窗佔咗車頂接近三分二面積，夠晒開揚。

動感流暢新造型

韓國車變型咗，並唔係偶然，就以現代為例，近年嚟有唔少新車嘅車身設計，都係交由歐洲分部嘅設計中心主理，難怪風格急轉彎！

至於近日抵港嘅Santa Fe Facelift小改款，分外注重外在美，例如車頭部分，用咗類似菱形設計嘅鬼面罩，全新嘅頭燈罩造型好似鷹眼咁銳利，着埋LED日間行車燈，「目光」更見神氣。車身主線條方面，A柱造型偏窄，大角度向上伸延，連接車頂以至闊身嘅C柱，襯埋高腰線及車尾嘅大輪拱，流線之餘又有力量感。車尾方面，用咗小尾翼及橫向式尾燈組，最引人注意係大大塊尾泵把有明顯嘅曲折線條，加埋底部嘅防撞板及雙出式尾喉，完全切合SUV嘅動感形象。

車廂布局同樣講究，首先T字形中控台已經頗有歐洲車影子，而且用埋多幅式重疊設計，更見層次感，若果波棍台與兩邊按鍵改用平面式設計，相信會多番一體化嘅美學效果，好彩波棍台前方偷位整咗個小型儲物格，實用度補番數。至於雙圈式儀錶板加咗大大個遮光罩，美觀與否就見仁見智，不過的確可以阻擋陽光，時時刻刻都可以睇清楚錶板訊息。唯美之餘，Santa Fe亦有高度實用性，首先座椅編排用咗同級少有嘅2+3+2七座布局，以空間感而言，中排最寬敞，至於後排都算可以接受，不過車尾置物空間的確細咗啲，想多載行李嘅話，最好先收起後排，所以個人認為後排嘅雙座位，偶爾出動幫到手，當做常規裝備就未必合適了。

周全安全設計

性能方面大致維持原狀，配置咗2.4L直四引擎，馬力與扭力分別為188ps及24.6kgm，配合六前速加減自動波，喺飛鵝山試車，起步反應相當爽快，而波箱運作亦保持水準，加速表現傾向斯文，喺彎路游走亦見穩定、可靠，四驅系統當然要記大功。除此之外，Santa Fe備有三種駕駛模式，分別係Normal、Sports及Eco，動感或節能，完全由你話事，隨車仲有Auto Hold，毋須啟動電子手掣，都可以安全停車再簡單踩油起步，至於BAS、DBC、ESS及HAC等輔助系統亦已列作常規裝備，睇得出廠方喺主動安全設計方面，確有高度重視。

文：Samuel　

攝：Homan