HTC One A9 翻身中階作

近年HTC手機叫好不叫座，好似M8、M9等無論功能、外形都有唔少用家讚好，但銷量卻非理想。作為台灣手機品牌龍頭，HTC就決定開發全新One A系列試市場水溫，新作One A9走中高階路線，大玩薄切金屬機身，兼且仲有1,300萬像素及光學防手震鏡頭、5吋全高清芒，仲要用埋Android 6.0，有賣大包博翻身味道。

$4,198（2GB RAM/16GB ROM）
$4,498（3GB RAM/32GB ROM）

機面採用2.5D Corning Gorilla Glass玻璃，配合5吋全高清屏幕，顯示清晰。

鏡頭位置稍稍凸出，使用時小心刮花。

支援microSD記憶卡，卡槽需要使用卡針打開。

厚度只有7.26mm，相當薄切。

動態縮時攝影可以於拍攝後直接調校播放速度，速度由2倍至12倍。

設有不同色彩設定檔，可輕微調校色彩顯示效果。

內置的BlinkFeed功能可將不同新聞及資訊整合。

於任何介面下長按Home鍵即可啟動Now on Tap，不過相關功能必須將系統語言改為英文先使用到。

一體成形金屬機

One A9啱啱10月尾先喺紐約發布，當時唔少網民一睇就話佢「明抄」iPhone 6，皆因此機採用一體成形金屬圓角設計，而且機背仲由常見嘅弧面改為平面，配合機背白色橫線天線，的確甚有iPhone影子。廠方表示呢種天線設計其實早於兩年前推出嘅M7已經採用，姑勿論邊個抄襲，One A9機身質感的確唔錯，表面、邊位順滑，加上厚度只有7.26mm及僅重143g，絕對唔累贅。留意新機暫時只會提供銀、灰兩色，想買官網現身嘅金色以及深紅色等其他配色就要慢慢等。

具備高質鏡頭

新機另一賣點就係鏡頭配置，分別採用UltraPixel前置鏡頭及1,300萬像素後置鏡頭，前置善於低光下自拍，後置更內置第二代光學穩定技術（O.I.S.），慢快門時手震機會自然大減之餘，亦備有「Pro影像模式」，用家可以調校快門、白平衡甚至RAW格式輸出等設定，進階影友最啱用。另外值得一講係新增嘅「動態縮時攝影」，可以將影片以2倍至12倍加速播放，拍攝後即時後製，效果好有動感，超過癮！

Android 6.0上身

雖然只屬中高階定位，不過One A9都照顧到一眾樂迷，支援24bit Hi-Res高解像度音樂，並內置DAC及高功率耳機擴音器，手機聽高質音樂從此冇難度。配合Dolby Audio環迴音效技術，得閒焚機都掂。One A9將會推出2GB RAM搭16GB ROM以及3GB RAM配32GB ROM兩個版本，同樣採用Qualcomm Snapdragon 617八核心處理器，效能唔算標青；勝在係市場第一部非Nexus系列嘅Android 6.0 Marshmallow機款，配合HTC Sense介面，介面操作分別不大，但備有Now on Tap智慧搜尋功能，於任何畫面下長按Home鍵，系統就會根據用家所在地以及正在瀏覽的內容而提供不同功能選項；亦可將記憶卡轉成內存空間使用，唔使再擔心內存不足，以後就可以盡情下載心水Apps啦！