每逢12月嘅聖誕檔期，就係大家銀包大放血嘅日子，玩具迷當然包括在內，不過你估11月又好過咩？今個月初，專做1/6 Figure嘅H字頭品牌，就有多款星戰Figure派貨，相信已經令唔少巴打銀包重創；一波未平，另一款玩具神物—Metal Build Strike Freedom Gundam亦啱啱抵港開售，官方嘅建議零售價係¥27,000，本地行情方面，截稿前介乎$1,700至$2,000之間。到底呢款新MB，值唔值得大家勒緊褲頭捱麵包呢？

專用底座附有特製支架，可以整齊、穩陣地安放分體後嘅龍騎兵組件，不過竟然唔包括光之翼Parts，有蠱惑……

MB Strike Freedom Gundam重約463g，加上飛翼部分又大又重，所以大部分甫士都要出動底座幫手。

雖然有巴打喺Forum表示中Sad貨，但係筆者嗰部就冇乜塗裝出界嘅問題，更加唔會離譜到有指模印，但願Sad貨只係極少數嘅例子。

機身水印都算印得清楚，過關冇投訴。

關節位嘅金色用上電鍍設計，光澤感交到貨。

Metal Build Strike Freedom Gundam
建議零售價¥27,000

雙槍合體駁長，係Strike Freedom Gundam嘅專利招數，MB版本做到忠實還原，咁大支槍，拎上手都算穩陣。

MB Strike Freedom Gundam「光之翼」。

墜手程度　遠勝Hi Metal-R

未擺甫士、未Check係唔係Sad貨之前，當筆者只係拎起呢隻新MB喺手，已經有唔錯印象分，事關不枉MB之名，夠墜手，攞上電子磅秤秤，有成463g，比起之前所謂嘅Hi Metal-R VF-1J，Bandai今次「老實」得多。至於造型方面，貫徹同系前作嘅Freedom Gundam，比起模型版多咗凹凸弧位，手腳亦保持修長，藉肌肉化線條達致擬人化效果，關節位置用上反光嘅電鍍金，都算還原到動畫機設中金光閃閃嘅效果，而且雕工細緻，唔只面相，就連胸口兩側嘅排氣口，以及腹部中間嘅光束炮等位置，都有清晰紋理，塗裝亦甚少出界。之不過，賣成27,000日圓嘅高檔貨，竟然喺頭頂嘅金色V形天線，以及前臂等位置出現明顯嘅水口位，對Strike Freedom幾有愛都要扣分。

關節受力　可動性高

可動性方面，唔會輸畀MG，甚至PG模型版本，最起碼手肘與膝蓋都可做到接近180度屈曲，掛上八枚「龍騎兵」浮游炮嘅飛翼組件，又可以向多方向擺動；另一方面，飛翼、膊頭、手肘、髖位、膝蓋以至足踝等主要嘅受力關節，都用金屬製成，藉此加強實淨程度，所以擺大動作甫士時，唔似模型版會手軟腳軟翼又軟，唔會嘥咗閣下擺甫士所花嘅一番心機。總體而言，MB Strike Freedom Gundam都算值回票價，尚待改進嘅地方，除咗上文提及嘅水口位，如果頭頂嘅藍色監察器，甚至黃色嘅雙目改用透明組件嘅話，會唔會喺色彩上更有層次感呢？

搶錢有後着

整體嚟講，今次嘅MB Strike Freedom Gundam都算係高水準作品，不過總係爭咗啲嘢，就係龍騎兵全發時嘅「光之翼」囉，摷勻成個Boxset都冇呢件特效Parts，唔使問阿貴，Bandai梗係收埋做網上訂購品啦！果然，就喺MB Strike Freedom Gundam上架嘅同時，p-bandai.jp網站宣布推出光之翼Parts，並已接受預訂，價錢都幾得人驚，盛惠7,000日圓，仲要下年6月先派貨，不過對死忠粉絲而言，睇怕都係會乖乖進貢，香港的Premium Bandai亦剛剛開訂，售價$490（未連運費）。

查詢︰2433 1828（瑞華行）

文︰Dick　

攝︰Homan