山野必備　Suunto Traverse　撐足100小時

十一月香港滿山是人，當中不少為備戰毅行者而來。要取得佳績，除了操體能、記路線外，一隻可靠的GPS智能手錶亦不可少！最近Suunto就揀啱時間推出全新Traverse系列，內置雙GPS系統定位零舍準確，而且續航時間長達100小時，至啱長途賽事。講到咁勁，立即搵來用家之一、資深越野跑達人Sam Tam（譚圳烽）品評一番！

Suunto Traverse　$4,200 （a）

除實時記錄路線，也可預先輸入路線，再依方向前進。

具備海拔、氣壓及溫度探測能力，周邊環境一錶掌握。

為每段路程計算均速及極速時間，有助訓練，提升表現。

連日出日落時間都計到，Wild Camp的話可預計估算紮營時間。

不設觸屏，操作有賴錶側實體鍵，指示清晰不難上手。

要用專用接線充電，充一次夠用14天（時間模式下）。

手錶可與程式Movescount同步，將時間、速度等資料儲存起來。

可跟手機的影相功能配合，並自動轉化為跑山路線的影片，呃Like至啱！

除了跑山，還可把不同運動模式輸入至手錶，方便量度出不同數據。

Sam Tam最欣賞手錶的100小時GPS續航能力，足夠應付全球超長距離比賽。

天氣轉涼，除了跑山，也是長跑好時節。Garmin Forerunner 225備有心測、計步、消耗卡路里及久坐提示等功能，加上數據可集中傳送至Garmin Connect雲端處理，適合長跑人士佩戴。　$2,399 （b）

輕身舒適兼防刮

「輕咗！之前用過Suunto Ambit3，錶身較墜，跑時揈手感覺一般。廠方指Traverse重量冇分別，但設計好明顯改良過，輕身咗舒服咗！」用家Sam Tam如是說。除了輕，Traverse還採用了礦物水晶玻璃錶面，擁有極高硬度，山野間不怕被硬石樹枝刮花；而且矽膠錶帶貼手之餘不黐手，減低長戴後不適感。顏色有琥珀黃、白及黑三色，三者均具備鎂光燈功能，夜間都睇得一清二楚！

雙GPS定位夠準

Traverse最大賣點是GPS及GLONASS雙衞星導航系統，覆蓋全球定位，Sam力讚︰「香港山路窄，樹林茂密，好多GPS手錶唔係收唔到，就係收得唔準。呢隻錶抗擾力好強，精確度及穩定度都高，得出嘅數據自然更有參考價值。」雙衞星系統還可用於規劃路線，讓用家更能準確掌握地形資料，藉此提升表現。另外它又懂得建議回程路線，對行山新手十分適合。

天氣預報續航力久

無論登山還是野外長距離跑，選手經常要面對天氣轉變。Traverse具備海拔及氣壓探測能力，可計算出日出日落時間，並兼具天氣警報能力，當暴風將至，它會以震動提示，提醒跑友們做好準備。Sam剛遠赴日本富士山參加UTMF超長距離賽事，對手錶的續航時間尤其關注，他表示部分手錶會在中途斷電，相反Traverse開啟GPS後依然夠玩100小時，實測試過跑8小時只用5%電量，超級長氣！不過世事無完美，Sam指手錶與官方Movescount程式的連接速度一般，期望下代可作出改善。