智能手機保安漏動消息幾乎無日無之，秒破密碼、資料上傳其他Server，勁多重要資料喺手機嘅用家梗係驚到有得震冇得瞓啦！與其秒秒鐘得個驚字，倒不如主動出擊，換部保安可靠啲嘅手機，又或者安裝保安Apps，軟硬兼施，自然最有保障！

BlackBerry PRIV備有5.4吋屏幕，解像度高達2,560×1,440。
$6,488（11月中旬推出）（a）

推開屏幕後為Qwerty實體鍵盤，打字手感極好。

機背採用類似擦膠嘅磨沙物料，啜手但黐塵。

虛擬鍵盤都支援手勢操作，最方便就係關聯字向上掃即揀，打字快得多。

《DTEK by BlackBerry》會隨時檢查手機嘅安全狀況並作出提示，相當貼心。

可以檢視各應用程式存取地點次數、時間同位置。

採用雙曲面屏幕，設計都幾靚仔。

SIM卡及記憶卡槽設於機頂位置，需要使用專用卡針打開。

Nexus 5X
$3,398（16GB）
$3,898（32GB）（b）

Huawei Mate
S$4,888（c）

Docomo ARROWS NX F-04G

《CM Security》會掃描機內私隱度不足嘅Apps，可以即時處理。

Samsung都一樣有Find My Phone功能，登入指定網址，就可以檢查手機狀態。

可以玩遠端鎖機，畫面即時被鎖，咩都撳唔到。

邊隻Apps存取緊用家資料就一清二楚，用完即關就最安心。

《iSafePlay》集加密、瀏覽器等多功能於一身，必裝。

香港資訊科技商會榮譽會長方保僑

主動出擊 嚴選安全手機 BlackBerry PRIV革新保安

BlackBerry手機向來深得商務用家歡心，皆因作業系統夠安全，通訊軟件又好使好用，不過缺點就係Apps唔夠多，而且系統兼容性相對低。今次新機PRIV終於首次改用Android作業系統，預載Android 5.1，整體操作與一般Android手機接近，此外仲同時加入BlackBerry Launcher介面，可以喺介面上進行微調，好似多工介面改為方格縮圖；畫面左或右側長設功能欄，一掃即可瀏覽最近資訊包括日曆、聯絡人。

另外唔少得就係品牌Signature嘅通訊軟件《BBM》，以及整合電郵、短訊、Twitter等不同社交帳號嘅《BlackBerry Hub》，黑莓用家倍覺親切。

轉會Android陣營

雖然轉投Android陣營，不過無損BlackBerry手機嘅安全性。其實PRIV型號命名源自「Privacy」一字，廠方一直強調PRIV係一部安全智能手機，設計上都加入唔少保安元素，並表示新機每個硬件都加入密鑰，配合認證功能，確保內容不會被更改；亦將Linux系統作出過千項修改以提高安全性。雖則以上所講用家睇唔到，但另一獨家功能就可以即時見效，就係屬優化安全監控功能嘅《DTEK by BlackBerry》，佢隨時根據不同設定，例如用家有冇開啟「開發人員選項」、所下載嘅應用程式是否來自信任網站等，從而判斷手機嘅整體安全性，再以指針圖示即時顯示安全程度。另外，用家亦可以查看各個應用程式所存取嘅資料，例如存取地點資訊嘅次數、持續時間、位置，邊隻Apps係「鬼」就無所遁形啦！

手勢Keyboard

至於PRIV機身設計亦有睇頭，一改以往上芒、下Keyboard嘅格局，改為5.4吋大芒，而且解像度仲高達2,560×1,440，顯示精細有層次。屏幕仲大玩雙曲面設計，似足Galaxy S6 Edge。用得BlackBerry機，實用嘅Qwerty鍵盤當然唔少得，只要輕輕將屏幕向上一推，實體鍵盤就會重現眼前，鍾意用邊款Keyboard由你話事。最正係實體及虛擬鍵盤齊齊支援手勢功能，好似向上掃可以選取關聯字、由右至左橫掃就係Backspace、向下掃就轉為標點符號，打字確實靈活又爽快。

SPEC

制式：GSM、WCDMA、LTE

處理器：Qualcomm Snapdragon 808六核心

記憶體：3GB RAM、32GB ROM，支援microSD

屏幕：5.4吋（2,560×1,440解像度）

鏡頭：前置200萬像素、後置1,800萬像素

對外連接：802.11ac、藍芽4.1、microUSB、NFC

作業系統：Android 5.1

電池容量：3,410mAh

體積：147×77.2×9.4mm

重量：192g

加密手機推介

一般Android用家都會使用圖案解鎖，不過喺個芒上畫畫吓，坐隔籬位隨時睇到解鎖Pattern，確實唔夠安全，所以近年唔少廠商都為手機加入不同形式嘅加密硬件，即睇！

Nexus 5X 指紋交易

Android系統最新版本6.0 Marshmallow其中一個最大賣點係全面支援指紋辨識功能，除可以用來解鎖，亦可在外國用作付費。呢部由LG代工嘅「親生仔」Nexus 5X就可以率先體驗一系列新功能，機背設有指紋感應器，可以為手機、應用程式上鎖，輕輕一掂就可以解鎖，既方便又安全。

Huawei Mate S 晶片加密

Mate S同樣備有指指紋識別器，而且解鎖最快只需要0.5秒，兼且支援不同動作指令，例如向下滑拉出通知選單、左右撥翻動相片等。廠方仲表示新機內置加密晶片，加強資料保密。

Docomo ARROWS NX F-04G 眼睛認證

呢款日系手機首次搭載「虹彩認證技術」，雙眼望住手機前置鏡頭就可以進行認證再解鎖，喺日本仲可以用作網購認證添！睇落夠晒科幻，不過實際係咪真係咁實用，就要等香港解到鎖，正式賣街先知。

自保有法 Smart Tips

Android專用安全App

相比起其他手機系統，Android 嘅開放程度就最高、最好玩，不過變相令安全性下降。睇番一般Android手機，「安全性」設定除咗屏幕鎖定嘅密碼、圖案，幾乎冇其他相關加密功能。要加強手機安全，就要小心使用第三方、尤其不經Play Store下載嘅Apps之餘，仲可以下載一啲可靠嘅保安Apps。好似著名嘅《CM Security》，就可以掃描機內私隱度不足嘅Apps，亦可以檢查用家連接嘅Wi-Fi是否安全網絡，甚至為Apps同埋相片上鎖，功能齊全。此外，近年部分手機廠商，好似Samsung咁，仲推出旗下手機專屬嘅《My KNOX》Apps，可以將手機劃分出安全工作區，必須使用密碼或指紋方可開啟安全工作區內嘅Apps，多一重保安關卡。

活用Find My Phone

依家好多廠商都加設類似Find My Phone嘅保安功能，一旦手機被人偷咗，都可以遙距鎖機、刪除機內資料等，就算冇咗手機都唔驚資料外洩。小記問過先達嘅手機舖，如果被機主鎖定，回收價即時大跌，賊仔想賺番筆都冇咁易。

iOS提案

iOS被稱為「最封閉系統」，一定要靠《iTunes》先可以將資料由電腦傳入手機，就連藍芽、NFC等對外連接都只係局部開放，加上近幾代iOS裝置仲有埋Touch ID指紋辨識功能，想破解偷資料已經好難。唯一要留意就係私隱內容嘅存取，設定內提供「私隱」一欄，用家可以檢查各個Apps 嘅存取詳情，萬一覺得有異樣就可以關閉相關嘅存取。另外，亦推介各位安裝《iSafePlay》，此Apps可以為文件、相片和影片上鎖，兼且同時提供影片、音樂播放器，特別在設有密碼保護，打開時必須輸入四位密碼，用家更可以設定假密碼Fake人！

達人建議：小心裝Apps！

方保僑香港資訊科技商會榮譽會長：「保安可分為幾個層面，如果擔心通訊軟件被人截取的話，可以考慮使用好似《Telegram》嘅Secret Chat功能，對話可以加密。另外，用家下載Apps亦要小心，尤其要留意由其他網站下載的APK程式檔，即使喺Play Store下載Apps亦要打醒十二分精神。舉個例，如功能最簡單嘅電筒Apps，部分會要求存取用家嘅鏡頭、聯絡人等資訊，所需資料與Apps功能無關，咁就要特別注意，大可下載另一程式取代。」

查詢：

（a）http://global.blackberry.com/en/smartphones/priv-by-blackberry/overview.html

（b）http://store.google.com/product/nexus_5x

（c）8128 8810

文：Vincent

攝：Man