由接近30年前嘅「聖衣大系」，再到千禧年後嘅「聖衣神話」，以至最新嘅「聖衣神話EX」，都一脈相承咗「換裝」設計，可以組裝成聖鬥士或星座形態，成為聖鬥士商品中最重要、最吸引嘅招數，根據筆者咁多年嚟嘅「敗家」心得，大多數嘅玩家將珍藏放於櫥窗櫃時，都會選擇聖鬥士形態。不過呢種主流作風，相信未必適用於剛剛上架嘅聖衣神話EX處女座神聖衣身上了。

聖衣神話EX處女座神聖衣沙加
建議零售價：¥12,000

唔只沙加嘅修為接近神，依家連聖衣形態都似足天神下凡，係今次EX神聖衣版本嘅最大賣點。

由大系到EX，再到今日嘅神聖衣版本，肩甲過大阻礙雙手擺動呢個問題都係冇解決到，難免令人失望。

雖然鞋底加厚咗，但係小腿裝甲太粗，令雙腳線條反而變矮咗。

人形身段　不似預期

雖然全數13集嘅《黃金魂》已經播放完畢，但係神聖衣版本嘅黃金12宮EX啱啱先出到第三款，就係繼獅子座艾奧里亞與白羊座阿穆之後，且被譽為「最接近神嘅男人」嘅處女座沙加。一如神聖衣嘅設計特色，新版處女座亦都喺背脊加裝一對大翼，將黃金聖衣獨有嘅華麗形象昇華起嚟，翼身附有多組關節，可以擺出多元化嘅飄逸姿勢，不過上半部類似觸鬚嘅設計，與變大咗頭盔會互相牴觸，影響咗頭部嘅活動能力。或者你唔介意，因為沙加好少戴頭盔，但係無論漫畫或動畫人設，處女座唔只男生女相，身形仲似足Model咁樣高挑修長；至於神聖衣版本嘅白羊座及獅子座，其實鞋底暗中加厚咗，處女座都唔例外，照計應該變得更Slim、身形拉長咗先啱，點知華麗背後，筆者發現效果不似預期，原因係神聖衣嘅裝甲線條有啲累贅，唔只多咗對翼，肩甲太橫、腰甲太厚，最礙眼係小腿裝甲實在太粗，同以往嘅處女座形象相比，實在有出入。

另一方面，就如之前嘅聖衣神話EX版本，今次嘅神聖衣亦都有蓮花地台，以便擺出「天魔降伏」時嘅招牌式盤膝甫士，不過難度比EX版本仲高，唔只多咗對翼阻住，雙腿嘅裝甲亦都太粗，增加咗屈膝嘅難度，雖然腰甲已經有多組移位關節，不過作用唔大，老實講，筆者花咗接近半個鐘，陷入嘗試、失敗、再嚟過嘅輪迴之下，先至擺到類似官圖嘅甫士。

星座形態　成佛升仙

講到人形狀態有咁多問題，唔通處女座神聖衣可以Pass慳番啲錢？咁又未必，因為今次嘅星座形態，唔只係歷代最靚，甚至係最能夠表達出「最接近神」嘅設計神髓。事關以往嘅處女座星座形態，都係雙手合十、雙膝跪地，十足一個虔誠嘅信女模樣，神聖衣版本就嚟個大變身，手勢不變，但係跪地變成直立，而原本過於橫向嘅肩甲，就變成向下延伸嘅裙襬，加上小腿裝甲與蓮花地台之間，另加長身嘅組件連接，抵銷咗小腿過粗嘅毛病，重現處女座應有嘅修長美態之餘，仲由信女變成天神下凡，即使誤以為係鍍金版嘅觀音像亦不為過。如果你都買咗呢款處女座神聖衣嘅話，又會開盒擺喺櫥窗櫃陳列嘅話，相信你都會揀星座形態吧！

查詢︰2433 1828（瑞華行）

文︰Dick　攝︰Homan