有啲嘢，真係試過返唔到轉頭，正如「味公主」薛家燕喺《食神》都話過︰「以後食唔番點算呀？」對於跑手而言，又有乜嘢可以同食神嘅「黯然銷魂飯」相比？就係adidas嘅Ultra Boost囉！呢款旗艦級嘅練習跑鞋，最近追加咗升級版本，令本已屈機嘅性能表現，變得更加無懈可擊，正如當你試過日本A5和牛之後，你會試番A4，甚至A3轉頭咩？

adidas Ultra Boost（女裝）$1,499

adidas Ultra Boost（男裝）$1,499

升級版嘅最大改變，係Stretch Web外底改用Continental輪胎物料，抓地力與耐用性都有所提升。

因應腳掌唔同位置，Primeknit織物鞋面嘅結構密度亦有不同，帶嚟稱心嘅支撐力與貼腳效果。

2011年渣馬10km亞軍，現職長跑教練嘅楊肇麟指出，Ultra Boost嘅中底雖然厚，其實前後掌嘅高低差唔算明顯，無論係前掌或後掌落地嘅跑手都適用。

《Good Tech》嘅跑步達人「小棟」，今年初都試過原裝版Ultra Boost（左），啱啱試埋升級版（右），佢就覺得後者嘅前掌內籠變闊咗，更加適合亞洲人嘅腳形。

Ultra Boost係adidas最頂級嘅練習跑鞋，而Boost就係品牌緩震最強、回彈最高嘅中底技術，Ultra Boost嘅設計特點，就係中底全掌都用上Boost物料，而Boost與鞋櫳之間並冇EVA分隔，腳掌可以直接感受到Boost嘅強大功能外，Ultra Boost所用嘅Boost密度，比其他Boost鞋款多咗20%，即係話，佢嘅緩震與回彈表現係品牌之最，筆者亦都有實試練跑，雖然距離只係短短5km多啲，不過都Feel到功能之強，真係跑贏唔少品牌。

新物料唔怕蝕底

Ultra Boost唔只中底設計出色，仲有好舒服嘅包裹感，做到貼腳而唔夾腳，長跑教練兼跑鞋達人「楊Sir」楊肇麟就有以下分析︰「呢款鞋同其他跑鞋最唔同嘅地方，係幾乎整個鞋身前段都用咗Primeknit，呢種織物鞋楦畀到跑手好舒服嘅感覺，好似着咗厚身嘅襪，唔似平時啲跑鞋咁易夾腳。」我哋《Good Tech》嘅跑步達人「小棟」，着齊升級前後嘅Ultra Boost，佢話升級之後更加好Feel︰「新版嘅前掌內籠好似闊咗少少，更加適合亞洲人偏闊嘅腳形。」

其實升級版嘅改動，唔只鞋籠變闊以及Primeknit鞋面用咗多色設計，更大動作為整片Stretch Web外底改用Continental橡膠輪胎物料，改善咗原裝版本嘅抓磨程度，楊Sir繼續解畫說︰「之前adidas都有個別跑鞋嘅外底，採用Continental膠料製成，我都有着過，呢種物料比較實淨啲，抓地力都唔錯，喺濕地上唔會有跣腳嘅情況，所以新款Ultra Boost都有同樣嘅性能。」

練跑萬能Key

莫道你在選擇人，人亦能選擇你，講到Ultra Boost咁好，佢會同邊類型跑手最啱Key？楊Sir說︰「Ultra Boost屬於比較厚身嘅練習鞋，我會建議跑手，如果平時練習唔使要求太快時間，可能係均速五分鐘，或者再慢啲一公里嘅話，又或者想做再長距離嘅練習都OK，因為呢款鞋嘅保護性比較強；但係正因為保護性太強，想發揮速度就冇咁理想。另一方面，雖然中底好厚，但唔只適用重磅嘅跑手，其實Boost嘅相容性好大，無論你係輕磅或重磅都適用。仲有嘅係，Ultra Boost嘅鞋踭相對較厚，就算腳踭落地比較重，都會保護到用家，而且再細心啲睇，其實佢嘅前後掌落差唔算大，就算係前腳掌落地嘅朋友，都唔會因為鞋踭過厚而出現棘腳嘅問題，前掌型跑手都用到。」

文︰Dick　攝︰Paul、Pen

查詢︰2730 0157（尖沙咀漢口道17號adidas旗艦店）