聖誕禮物預告 ES合金Shin Getter 1
臨近年尾，又到咗玩具年結嘅時候，唔少品牌都馬不停蹄趕交成績單，例如早前Bandai喺秋葉原舉行「魂Nations 2015」，展示咗Q版《真三一萬能俠》Figure，其實「頭啖湯」已經被Action Toys搶先飲咗，事關後者今年中先出完高迪安，就密鑼緊鼓籌備ES合金真三一萬能俠一號「Shin Getter 1」，新作依然由香港原形師Lu.K主理，造型更細緻，又用埋跟EX合金版本一樣嘅塗裝效果，加埋LED着燈眼珠以及左右望機關，咁多賣點，幫香港玩具界又威多次。
ES合金《真三一萬能俠 世界最後之日》Shin Getter 1
建議零售價：¥9,000
「Getter Sunshine」呢招必殺技，玩《超級機械人大戰》就用得多，ES合金就將佢實體化。
特效Parts用磁石吸住肚臍，就可施展紅色三一射線亂射。
將特效Parts裝喺額頭，就可傳神重現「Getter Beam」三一射線。
打開後尾枕，就可轉動旋鈕，令眼珠左右睩。
拆走大斧頭，換上刀刃組件，就可變成大鐮刀。
Machine Gun嘅表面用咗煙硝金屬配色，增加質感。
肩膀內藏延伸關節，舉起膊頭都唔會頂住頭部嘅尖角。
着燈眼珠左右轉
ES合金Shin Getter 1嘅造型，自1998年OVA動畫《真三一萬能俠 世界最後之日》，機體以生化姿態重新演繹，戰鬥場面血腥得嚟又勁有型，今次Action Toys將佢Q版化，雖然變咗頭大身細，但霸氣依然，而且心口以下到雙腳，幾乎全屬合金用料，分量十足，加上表面採用跟EX合金一樣嘅金屬塗裝，酒紅色嘅膊頭最醒目。除此之外，面相用咗綠色透明件呈現內部結構，雙眼內置LED着燈之餘，眼珠仲識左右轉，原來後尾枕設有旋鈕，輕輕轉動，雙目就會跟住左右移位，好多日系Q版合金都未做到。
傳神出招Parts
至於可動性方面，ES合金Shin Getter 1嘅表現充滿驚喜，肩膀、髖位都內藏延伸關節，壓腿或者雙手向前舉等富動感嘅大動作都可輕易擺到，唔會棘住晒，惟略嫌軀幹比例未夠粗壯，令氣勢打折扣。武器方面附有超巨大三一戰斧及鐮刀，仲有Machine Gun，戰斧與鐮刀都係共用柄桿，只需換件就玩到兩款形態，留意斧頭重心明顯較重，單手拎嘅話好易「不舉」。想玩得更加入戲，就要用埋隨盒嘅出招特效Parts，包括裝喺頭頂，以及用磁石吸住肚臍嘅「Getter Beam」三一射線，仲有插落掌心嘅「Getter Sunshine」。呢款新品現已進入最後調整階段，預計年尾就可上架，各位三一迷嘅聖誕禮物有着落啦！
查詢：2390 9843（Action Toys）
文：Alfred 攝：Homan
