FF街霸重出江湖　Honda Civic Type R

本田（Honda）紅極一時嘅Civic Type R，終於有新車到港，唔只首配Turbo，而且係代理自行返貨，夠晒破天荒！新Civic Type R有幾猛？喺紐布寧北環賽道測試時做出7分50秒63嘅單圈成績，已經夠晒說服力，一舉登上當今最快圈速量產頭驅（FF）車嘅寶座，被譽為「Race Car for the Road」，絕非浪得虛名！

電子顯示屏可顯示G力，甚至提供0-100km/h嘅加速計時功能。

波棍台前方設有車輛編號名牌。

六前速手波配合短行程波棍，轉波鏗鏘利落。

紅、黑雙色軚環營造出鮮明對比，充滿戰鬥格。

車尾裝上大型尾翼，唔打得都嚇得。

原廠配上19吋輪圈，前輪用埋紅色Brembo四活塞制動卡鉗。

前座用上桶形設計，提供良好嘅包裹性。

安全帶用上全紅色，令車廂布局辣到出樣。

今年嘅配額已經全數沽清，仲想後追嘅車迷，要有心理準備明年先交到車。

見到鬼面罩嘅紅底色廠徽及Type R徽章，就知唔係善男信女！

排氣喉採用左右四出式設計，盡顯辣跑本性。

啟動+R Mode，油門及懸掛設定都會趨向高度運動化。

今代Civic Type R首次配置Turbo，馬力爆升至310ps。

Civic都有310ps？

新Civic Type R選擇喺英國Swindon嘅本田廠房製造，無論喺香港或日本出售版本，產地都係英國，同屬「進口車」。Civic Type R嘅賣相向來囂張，今代都改唔到，見到隻大尾翼、紅底Honda廠徽連Brembo「鮑魚」已經夠嚇人，「輸人唔輸陣，唔打得都嚇得」，Civic Type R於1997年推出，歷代車型喺全球都有唔少Die Hard Fans，相關車會更不計其數，當廠方喺2010年一度宣布停產時，個個都以為以第八代Civic開發出嚟嘅Type R已經係終結篇，搞到車迷鬼死咁失落，好彩廠方收回成命，先有今日嘅全新版本。

由EK9到EP3，以及FD2/FN2世代嘅Civic Type R，引擎都用自然吸氣（NA）形式，發展至今日配上i-VTEC Turbo嘅FK2，性能完全係兩回事，翻查資料，1997年EK9 Type R嘅最大馬力係185ps，FK2 Type R已經飆升至310ps，增幅高達67%！而六前速手波屬於標準配置，無棍不歡嘅熱血車迷肯定啱「嘴形」，波棍採用短行程設計，利落嘅轉波過程，好易就會燃點起快跑意欲，官方公布0-100km/h只需5.7秒、極速可達270km/h，筆者見之都有一刻懷疑過，呢部真係Civic？雖然Civic Type R嘅性能咁得人驚，不過操控上非常易於上手，特別係離合器十分輕腳，操作起來毫不吃力。

高度攻彎服從性

試車前，筆者望一望Civic Type R嘅四隻「腳」，忍唔住「嘩」咗一聲，新車落地冇幾耐已開晒胎，可想而知上幾手試車嘅朋友幾咁「愛不釋手」，唔知激戰咗幾多個回合？310ps嘅頭驅車，相信好多人都覺得會推頭推到爆，實際上又冇咁嘅情況，轉向帖服而且非常咬地，彎路極限之高令人難以相信，扭幾多都會跟住入，只怕你冇Guts踩，除非嚴重超速或操控失誤，否則都好難出亂子；若果啟動+R Mode，油門反應仲會加倍敏銳，懸掛設定亦會更趨運動化，進一步提升駕駛樂趣。目前代理開出嘅新車推廣價為$556,800，今年配額已經全數售罄，預計今年12月起陸續交車。