松本零士專訪　宇宙無限

無論美國嘅荷里活，或者係日本嘅動漫舞台，都有好多「外星人侵略地球」嘅科幻故事，要數當中風格最浪漫嘅原作者，筆者首選松本零士，佢嘅故事唔只天馬行空，而且發人深省。雖然《銀河鐵道999》、《千年女王》及《宇宙海盜夏羅古》等大作已經係上世紀嘅作品，不過多得互聯網，令唔少80後、90後都接觸得到，從而孕育出一代又一代嘅粉絲。最近香港就有一個動漫展覽，用以上三部作品為主題之餘，仲邀請到松本老師到場觀禮；訪問松本老師嘅機會，仲難過買飛上999列車呀！

松本老師希望喺有生之年，為《銀河鐵道999》、《千年女王》及《宇宙海盜夏羅古》創作出一個集大成嘅結局。

場內展出多幅松本老師嘅真迹畫作，唔少係近期所畫，睇出老師寶刀未老。

靜靜坐於車廂內嘅美達露，端莊嘅儀態加上憂鬱嘅眼神，似足動漫中嘅神髓。

喺宇宙觀景亭嘅千年女王，用咗五十嵐老師筆下嘅新造型。

唔只角色Figure，場內仲有999列車作為大型場景，分外入戲。

《銀河鐵道999》
美達露

《銀河鐵道999》
車長

《銀河鐵道999》
星野鐵郎

《宇宙海盜夏羅古》
夏羅古

《千年女王》
雪野彌生

《千年女王》
雨森始

左：《千年女王》與《銀河鐵道999》明信片（五十嵐優美子版本）
右：《千年女王》明信片（香港版本）

1:1主角大團圓

今次展覽喺將軍澳東港城舉行，以《銀河鐵道999》、《千年女王》及《宇宙海盜夏羅古》三部松本作品為主題，唔只有美達露、雪野彌生及夏羅古三大主角嘅1:1 Figure，就連星野鐵郎、雨森始及車長等角色亦都Figure化，加埋999列車與冬日月台，以及宇宙觀景亭等大型場景，置身其中，就好似變成松本故事中嘅其中一個人物，與以上角色穿梭宇宙；最有心思係車廂內嘅種種布置，展出多幅老師嘅真迹外，仲有美達露靜靜坐於角落之中，但凡粉絲者，相信都好想坐喺隔籬合照一番。

金星可能有文明

《銀河鐵道999》、《千年女王》及《宇宙海盜夏羅古》都係70、80年代嘅作品，繼漫畫及TV動畫之後，陸陸續續有劇場版，甚至廣播劇、舞台劇等作品延伸，三個故事仲不時Crossover，喺老師嘅構思之中，到底有冇實在嘅結局呢？松本老師說︰「依家嘅故事發展只係去到中段，美達露、千年女王、夏羅古三個故事都係處於同一時空、同一世界觀，三者都係出自一個大故事，我當然想佢哋有個集大成嘅最後結局，我希望喺我有生之年做到，我依家都努力緊。」年屆77歲的老師仲未言休，粉絲安樂晒啦！

以上三個故事，都以太空為舞台，仲有唔少外星人角色，不過喺現實之中仲未搵到外星人，只係推斷火星有水，老師有冇失望呢？他說︰「唔只火星有水，金星可能都有古代文明遺迹，所以我估人類嘅先祖有可能由金星輾轉嚟到地球，我哋要對依家嘅生活環境好好愛惜，地球係一個好好嘅環境，如果我哋再維持依家嘅生活方式，地球就好難保持落去，況且金星可能仲有人類存在，難保佢哋將來唔會侵略地球。」另一方面，松本老師筆下嘅人類，往往過於依賴、甚至迷失於科技之中，結果聰明反被聰明誤，招致滅亡嘅危機，如今再度反思，老師會否改變想法呢？他續說︰「我嘅想法未有變過，人類作為一個物種，而地球嘅環境不斷變化之中，人類應該好好諗吓點樣適應環境，太過依賴科技，好可能變成故事中嘅下場。」作為松本老師嘅忠實讀者，又有冇好好深思呢？

必買明信片

除咗《宇宙戰艦大和號》，松本老師其他嘅科幻作品，商品化嘅程度都唔算高，所以今次展覽特設Pop Up Store，搜羅咗多款與《千年女王》、《銀河鐵道999》及《宇宙海盜夏羅古》嘅特色精品出售，粉絲記住要把握機會了！除咗模型、Figure與Tee等熱門款式外，仲有罕見嘅汽酒，以及充滿和風嘅屏風、紙扇及棒球褸。筆者心水推介係明信片，其中兩款分別畫上雪野彌生及美達露，畫風同松本老師好唔同，原來出自《小甜甜》原作者五十嵐優美子手筆，係專為今次活動而炮製；另外兩款都畫上美達露及星野鐵郎嘅頭像，背景分別係太空館及天星小輪，將松本氏嘅科幻風與香港景色相結合。