點解adidas唔喺香港上市?有財經消息透露,原來過去一年adidas嘅股價升咗超過30%,就連身為股東之一嘅埃及富豪Nassef Sawiris,仲將持股量追加到41%!勢頭咁勁,唔通同Boost熱賣有關?講到做生意,筆者識條鐵咩,我淨係知Boost唔只係adidas最新、最勁、最主打嘅緩震技術,仲係其他對手想跟都跟唔到嘅頂尖科技;唔係我作大,係Udo Müller先生話畀我知(口架)!

Udo Müller
adidas產品拓展及傳訊總監

發布會唔只有主持、短片及實物,仲出動埋圖畫解畫。

呢片厚厚嘅白色中底,就係adidas重點開發嘅Boost,緩震與回彈表現都係品牌之最。

近年嚟跑步熱潮大盛,Boost亦以跑鞋起家,而且喺外形上亦兼顧時尚特色。

除咗緩震與回彈,Müller強調Boost鞋款仲有好強保護性,可以令你我他等尋常跑手遠離受傷,放心享受運動嘅樂趣。

早前adidas舉行咗發布會,向運動迷及傳媒解說Boost嘅技術特點。

新鮮熱辣嘅今屆柏林馬拉松女子組冠軍Gladys Cherono,所用鞋款正係adios Boost。

adizero adios Boost 2
$1,299

Messi 15.1 Boost Indoor
$999

adizero Tempo 7
$1,099 (左)
adizero Takumi Ren 3
$1,359 (右)

Energy Boost ESM
$1,299 (左)
Solar Boost
$699 (右)

Supernova Sequence 8
$999 (前、後)
Ultra Boost
$1,499 (中)

D Rose 6
$1,399/對

緩震回彈無縫銜接

Udo Müller係何許人也?佢唔只係一個健談、風趣、好記性嘅德國人,仲係adidas總部嘅產品拓展及傳訊總監,早前佢由德國遠道來港主持發布會,向香港嘅運動迷詳細解說Boost嘅技術特性。先講主流嘅運動鞋中底材料,通常都係一種名為EVA嘅泡棉,具有一定嘅緩震能力,但係回彈效果唔算顯著,而且緩震效能會隨住氣溫與時間而有所變化;Boost就係一種新穎物料,由adidas於2013年首度推出,雖然個樣好似發泡膠,實則完全兩回事,Boost嘅原始真身係E-TPU微型能量顆粒,透過熱融無縫方式,將數以千計嘅顆粒結合製成一塊過嘅中底,摸上手軟綿綿、彈彈吓,喺觸地嘅一瞬間,就可吸收大部分嘅壓力,隨即轉化為能量,憑藉高彈性大幅度釋放出嚟,成為快速而顯著嘅回彈力。Müller以圖表顯示研究結果,EVA嘅彈性數值為「75」嘅話,Boost就高達「84」,而且根據University of Calgary嘅研究報告,發現使用Boost嘅跑手,比起EVA用家可以減少1%嘅氧氣消耗,咪睇小呢1%,用喺馬拉松嘅長跑比賽上,往往就係勝負分野。Müller仲列出「人證」,包括去年柏林馬拉松嘅男子組冠軍Dennis Kimetto,以及今屆嘅女子組冠軍Gladys Cherono與亞軍Aberu Kebede,佢哋都係adios Boost嘅用家。

未來發展內有玄機

雖然Boost推出咗只有兩年,但係好多對手已經急起直追,相繼推出類似產品,adidas怕唔怕畀人搶生意先?Müller就答得信心十足,他說︰「其他牌子都好鍾意用相似嘅物料,不過好彩,只有我哋先真正擁有Boost,佢哋多數都用EVA,Boost係完全唔同嘅物料,佢係E-TPU,係Expanded TPU,係完全唔同嘅化學物質,係好柔軟、好有彈性嘅物料。其他牌子仲用緊EVA,結構上好易變形,平時都保持到軟身,但係例如冬天去到加拿大,就會凍到變硬,特性唔夠一致,Boost就冇呢個問題,由我哋開始研發到今日,Boost都冇走樣。最初我哋只可以小量生產,依家已經發展出多類別嘅跑鞋,甚至籃球鞋,以至其他運動鞋類別都用到Boost,喺製作過程之中,我哋學到由革命變成進化。」顯而易見,adidas已經將Boost視為撒手鐧,將會全方位部署,就算你唔係跑手,鍾意嘅係其他運動,都一定有機會感受到Boost嘅威力。

既然Boost咁厲害,會唔會唔只運動鞋,就連其他運動產品都用得到?Müller就答得好小心,他說︰「呢方面……我唔可以講太多,其實我哋都做咗好多波鞋以外嘅Boost測試,希望發掘到Boost嘅其他用處,例如足球……我舉例咋!」畫公仔畫到出晒腸,你懂的!除此之外,基於技術特性,面世至今、任何鞋款嘅Boost都只有白色一種,不過喺今次嘅發布會上,Müller都漏咗少少口風,他續說︰「到底Boost有冇其他顏色?其實我哋已經做緊測試,做緊嘢喇!」

新品Show Power

正如Müller所講,Boost嘅版圖已經在擴闊之中,就以籃球為例,啱啱上架嘅D Rose 6嘅前後掌就用咗Boost;就連一向冇乜緩震設計嘅硬地足球鞋,adidas都夠膽變天,推出咗Boost中底嘅Messi 15.1 Boost Indoor。至於老本行跑鞋類別,今期亦有多款新鞋推出,包括被視為贏牌之選嘅比賽鞋adizero adios Boost 2加推咗黑色版本,同期又有Tempo 7、Supernova Sequence 8、Energy Boost ESM、adizero Takumi Ren 3及Solar Boost等練習鞋。到底Boost會唔會稱霸未來嘅運動鞋舞台?我唔敢講,不過最起碼喺依家嘅跑鞋世界,絕對係一路旗幟鮮明嘅強勢諸侯。

查詢︰2730 0157 (尖沙咀漢口道adidas旗艦店)

文︰Dick 攝︰Paul