香港庶民風俗淳樸而搞笑，習慣稱顧客為靚仔和靚女，茶記伙記連望都不用望食客一眼，就問：「靚仔/靚女，食咩呀？」

西藏商販也來這一套，隨街都有人走來說：「美女，買甚麼甚麼啦！」

回港後，跟朋友說起，有個笑問：「日日有人叫你美女，你頂唔頂得住呀？」

我笑說：「梗係頂得住啦我，美女的真正意思不過是顧客。商販唔識你，又想你開心幫襯花多點錢，唔叫美女，難道叫你阿貓阿狗咩！」

如果我做小販，即使看見大媽大嬸，都會稱她們美女，同樣兩個字，肯定不會得失人客。萬一有大媽最討厭人叫她大媽，說不定聽到大媽兩字會放血滴子，說錯稱呼累自己無辜中招就無謂。所以，滿街都是靚女和美女，反正都係一句。

最近看《慧眼照雪域─活佛父子鏡頭下的西藏1925-2005》圖文集，作者生於富裕家庭，他的爸爸在1925年玩攝影和沖印，足以反映家族富有。作者多次寫他的母親是美女，例如「我母親的美麗在當時肯定備受矚目」，一看照片，覺得她有點像笑片諧星男扮女裝，也許作者父子扮女人都比她美麗……對於美女準則，我真係識條鐵咩！

人來人往，聽到讚賞不必高興，面對批評也不用生氣，反正都係一句，沒有甚麼大不了。