變色提示　NB回歸英雄地

除咗上文提及嘅Fresh Foam，相信最深入民心嘅NB鞋款，莫過於574、576、998、1300等經典型號，原來唔只日常練跑到逛街襯衫，就連踢波都可以揀NB？其實NB早喺上世紀80、90年代，已經推出自家嘅波Boot、波衫，仲搵嚟英格蘭球星白賴仁笠臣（Bryan Robson）做代言人，不過去到90年代中後期先至淡出足球界。豹隱咗咁耐，NB今年正式歸位，唔只簽到利物浦、史篤城、西維爾、波圖及些路迪嘅波衫合約，上半年仲推出咗兩款全新波Boot—Visaro與Furon，如今臨近年尾，NB為Visaro與Furon追加新配色，保持新鮮感，藉此提醒各位球迷︰NB已經返咗嚟！首批Visaro與Furon都採用淺色設計，分別係白色及淺藍色，新批次齊齊變深色，仲玩撞色效果，Visaro變成墨綠×湖水綠，Furon就改為粉紫×湖水綠，早前如果因為色調太淺而揀唔落手嘅球迷，今次會否回心轉意？