TMS直擊Part 2　滿載期望新Prius全面升級

唔係我哋崇日，只係日本車喺香港熱賣咗咁多年，尤其是豐田（Toyota）型號，多年嚟都係本地銷量榜嘅台柱，去到每一條街，梗有豐田型號喺左近，自然有親切感，所以每逢東京車展（Tokyo Motor Show，簡稱TMS），大家特別關注豐田是常識吧！一如以往，今屆嘅豐田參展陣容絕冇令人失望，拍埋姊妹品牌凌志（Lexus），新車絡繹不絕，最令人期待嘅當然係第四代Prius！

Toyota Prius

新Prius嘅車體變得修長咗，似Sedan多過Hatchback。

Hybrid系統嘅運作狀況，清晰展示於中控台屏幕上。

Toyota FCV Plus

Toyota Kikai

Toyota C-HR

Toyota S-FR

Lexus GS F

Lexus RX450h

Lexus LF-FC

除咗新車，豐田仲展出自家機械人Kirobo，萌到冇朋友！

呢部Daihatsu嘅快餐車，實用又夠Cute，財爺早前講過香港可以引入快餐車，呢架又啱唔啱心水？

各式車型以外，場內仲有唔少與車有關嘅新品展出，當然唔少得輪胎檔位啦！

繞場一周，今屆TMS嘅車展女郎大走活力及端莊路線，形象健康得嚟唔會搶咗新車風頭。

環保雙辣招

Prius唔只係全球首個Hybrid量產車款，累積銷量亦都係No.1，由1997年推出至今、合共三代型號，總銷量超過350萬部！老祖宗咁威，想成功接棒，當然要青出於藍，喺今屆TMS現身嘅第四代Prius，唔只形象大革新，以戰鬥格取代親和力，而且改用TNGA（Toyota New Global Architecture）底盤，抗扭能力提升咗60%，配合Toyota Safety Sense主動式安全系統，以及轉線提示、主動頭燈、鄰線盲點監察及雷達巡航系統等新裝備，大大改善安全表現。動力方面以1.8L Atkinson引擎作主導，單計引擎已經有98hp馬力及14.8kgm扭力，引擎嘅熱效能仲改善咗40%，令引擎更快進入工作溫度，而且整個新Hybrid系統輕咗20%，預期更快更慳油。至於驅動模式唔只有前驅（2WD），今代仲增設E-Four電子四驅，行車穩定性加倍令人期待。

慳油，唔只Hybrid一招，豐田同場仲有FCV Plus概念車，燃料電池模組置於前軸中間，而氫氣儲存缸位於後座背後，最特別係電動馬達收藏於車輪之內（in-wheel motor），顯而易見，如此布局為車廂慳番唔少空間，所以雖然車仔細細，都可以滿載四人。FCV Plus能否成為豐田喺環保車市場上嘅另一傳奇？相信要畀多啲時間觀察了，事關廠方強調FCV Plus仲喺實驗階段，距離量產化仲有一段距離。

再續小跑車傳奇

FCV Plus固然係前衞作品，同屬豐田旗下嘅Kikai更加係顛覆常規，呢款概念車車仔細細，體積只有3,400×1,800×1,550mm（長×闊×高），軸距亦僅長2,450mm，最大特色係引擎、懸掛、油缸及整套排氣系統等機械裝置，都唔係收喺車殼之內，而係無遮無掩外露出嚟，配合銀色嘅車身，大賣重金屬形象。另一特別之處係全車只坐三人，乘客席分布左右，中間安裝咗類似McLaren F1嘅中置式駕駛席，配合埋360度嘅大面積車窗，四輪又用咗「軨冚」取代輪圈，出位之餘，仲將懷舊與創新結合為一。

Kikai會否量產仲係未知之數，不過同屬概念車嘅C-HR已經望到家鄉，佢嘅雛形係去年巴黎車展亮相嘅Keen Look，之後幾經修改，包括車體由三門變五門，繼而改名為C-HR，再於上個月嘅法蘭克福車展及現時嘅TMS出場，仲會安排喺明年三月嘅日內瓦車展再亮相，出鏡率咁高，皆因廠方已經拍板量產，當然要爭取曝光率啦！另一方面，繼Toyota 86之後，廠方對雙門小跑車似乎想乘勝追擊，喺今屆TMS發表咗S-FR概念跑車，車身長度只有3,990mm，長車頭、大斜背嘅身段，令人想起60年代嘅Sport 800；廠方強調S-FR唔只輕量化，仲用咗中置引擎、後輪驅動布局，令前後車重盡量達致平衡之餘，起步、加速分外有速度感，再考慮到1.5L直四引擎嘅130hp馬力及15.5kgm扭力，對應車重只有982kg，配合六前速手波，想慢都難！雖然廠方未有表示量產與否，但係觀乎全車內外裝潢都完成度高，性能配置又咁齊全，明年開售都不足為奇。

凌志霸氣盡現

凌志陣營主打量產型號，例如視平治（Mercedes-Benz）E63 AMG及寶馬（BMW）M5為對手嘅GS F，性能當然不同凡響，D-4S 5.0L自然吸氣V8引擎可輸出467hp馬力及55.0kgm扭力，配合八前速自動波，堪稱同系最強，就連車身外觀都顯得霸道過人，全黑色蜂巢鬼面罩、誇張嘅導流槽造型，仲有好似利劍咁鋒利嘅頭燈罩線條，一望就知絕非善男信女。至於已經發展至第四代嘅RX，同系最新頂級版本RX450h亦有亮相，軸距由2,740mm增加至2,790mm，可以預期車廂空間會有顯著增長，而3.5L V6引擎與電動馬達合組嘅動力系統，廠方表示耗油量可低至18.8km/L。

除咗量產車，凌志亦有概念車派台，仲係旗艦級作品，被視為新LS雛形嘅LF-FC，車身應用咗L-finesse設計理念，從任何角度欣賞，都會感受到濃烈嘅動感與科幻色彩。性能方面，廠方會為LF-FC特製高效能燃料電池外，仲有由CFRP物料打造嘅21吋輪圈，配合四驅模式，務求做到大功率輸出、輕量化與穩定性兼備。