Fiat 500應節版　零驚嚇多多趣

嘩鬼出沒注意！聽日就係「哈囉喂」萬聖節，你又買定糖果準備招呼小朋友未？想應節，唔只大人小朋友可以奇裝異服，就連車都可以Cosplay一番，一向以潮味掛帥嘅意大利Fiat，啱啱就粉飾咗一部500哈囉喂特別版，齊齊搞氣氛！

全車布滿萬聖節嘅主題拉花，驚嚇不足，過癮有餘。

中控台編排依舊，音響組合可以Blue & Me介面與手機連線。

若想增加置物量，只需放平後排靠背即可。

1.4L直四引擎嘅馬力達100bhp，足夠應付本地路面。

織布座椅用上雙色配搭，靠背繡上車系字樣。

連車頂與擋風玻璃，都加設南瓜、蜘蛛和蜘蛛網等應節裝飾。

萬聖節黑衣變身

現正喺灣仔陳列室展出嘅Fiat 500萬聖節特別版，係由Fiat 500 1.4 Lounge喬裝而成，車身係充滿神秘感嘅全黑色，而頭冚及兩邊車身就貼上鬼爪拉花，車頂及擋風玻璃就有南瓜、蜘蛛與蜘蛛網等裝飾，夠晒應節，今明兩晚揸住佢落老蘭遊街，肯肯定贏盡收視，甚至引嚟途人爭住坐。

一成首期出車

車廂跟車身一樣，都以黑色做主調，全車座椅屬於織布款式，承托力與觸感兼備，而且採用對比分明嘅黑、白雙色，分外Eye Catching。中控台編排依舊，附設Blue & Me介面及聲控功能嘅音響組合、電動天窗及恒溫冷氣等統統有齊。動力結構沿用車系主打嘅1.4L直四自然吸氣引擎，馬力與扭力分別達100bhp及13.6kgm，配合有加減波功能嘅五前速Dualogic波箱，應付本港路面都綽綽有餘。

萬聖節特別版，平日未必用得着，不過全新配色嘅Fiat 500 1.4 Lounge，就Fit到唔少年輕潮人嘅口味，今期車價只係$198,000起，若果分六年供，只需畀一成首期，仲免你首三個月供款，之後月供只係$2,712起，仲有五年原廠保用，係人係鬼，都知係筍盤啦！