TMS直擊Part 1 日產火辣戰車搶山內一典風頭

作為車迷，有邊個冇玩過PlayStation嘅《Gran Turismo》系列？「東網生活」Facebook就啱啱報料，發現「GT之父」山內一典喺Paris Games Week遊戲展現身，仲以為佢會公布新一集GT幾時推出，點知只係Talk Show一場，各位車迷兼GT控又要等等了（其實都慣啦……）；唔使失望住，Game未有得玩，但係與GT系列有關嘅辣車，就喺地球嘅另一邊—日本有得睇，同期舉行嘅第44屆東京車展（The 44th Tokyo Motor Show 2015，簡稱TMS）之中，日產（Nissan）就有多款新世代車型登場，當中包括無論車迷或Game迷，見到一定雙眼放光嘅Nissan Concept 2020 Vision Gran Turismo！

Nissan Concept 2020
Vision Gran Turismo

日產場區設有Nissan Concept 2020 Vision GT賽車模擬遊戲，大把車迷爭住玩。

山內一典（中）喺Paris Games Week遊戲展現身，雖然大談新GT嘅開發點滴，但係始終未講幾時出喎。

Nissan Leaf

Nissan IDS Concept

Nissan Teatro for Dayz

椅墊部分看似平平無奇，其實可以顯示多種圖像，甚至動畫都得。

RX-Vision Concept

概念GT升級實體化

GT迷見到呢部超現實跑車，係唔係有啲熟口熟面呢？無錯，佢就係去年喺英國Goodwood Festival of Speed首度曝光、專為慶祝《GT》系列15周年而設計嘅1:1 Nissan Concept 2020 Vision Gran Turismo，事後原來日產再作修改，以全新面貌喺今屆TMS登場，改動包括換上全新Fire Knight車身顏色、V-Motion鬼面罩加入電鍍處理，仲有重新設計、賣相更誇張嘅全車包圍，老老實實，實物個樣仲惡過電玩中嘅CG畫面！

咪以為此車只應Game內有，其實性能設定都有根有據，廠方安排咗V6雙渦輪增壓引擎及三個電動馬達組成動力系統，名為FR-4WD，仲有扭力分配控制，當車速超過300km/h，大尾翼就會升起，產生逾400kg嘅下壓力……講到似層層，會唔會係日產將來參加Le Mans嘅戰車雛形呢？

Leaf接班雙重奏

唔經唔覺，日產首款量產電動車Leaf，自2010推出至今，已經喺全球售出逾18萬部，數數手指，依家係時候進行Facelift工程吧！廠方藉今屆TMS展出Leaf升級版，搭載全新30kWh鋰離子電池，喺滿電狀況下，續航距離長達280km，而且着意加強安全設計，追加咗防追撞緊急煞車系統及車道偏離警示功能；10月尾首展，12月就會率先喺日本開售，使唔使咁快手呀？

未算，事關疑似接班人都同場現身，被視為新一代Leaf雛形、名為IDS Concept嘅新車，唔只延續全電動設計，仲有好多破革新招數，包括對開式車門、四個獨立座椅布局，以及Nissan Intelligent Driving自動駕駛技術，後者備有Manual Drive及Piloted Drive兩種駕駛模式可供切換，當中嘅AI系統透過感應器，可以認知交通規則、閱讀路牌及監測路況，仲會適應車主嘅駕駛風格與習慣，隨時作出貼心導航。除此之外，中控台面向車頭方向設有LED傳訊板，顯示簡單訊息，例如「After You」，示意行人先行，讓駕駛者與其他道路使用者建立清晰而友善嘅溝通。

電動家族開枝散葉

除咗Leaf家族，日產仲有多款新車首展，例如專為年輕族群而開發嘅電動概念車Teatro for Dayz，四方造型夠趣致，頭尾燈組用咗長條形LED，最特別係座椅用咗長櫈式設計，看似平平無奇，其實椅墊表面可以變換出唔同主題嘅圖像及動畫，玩味特濃，加埋中控台嘅大型數碼化屏幕，可以上網、打機、聽歌，甚至成為與朋友聯繫嘅溝通平台；好玩還好玩，怕唔怕搞到駕駛者分心呢？

萬事得轉子重生

自RX-8以後，萬事得（Mazda）再冇推出過轉子引擎車款，等到今屆TMS，終於見到曙光！事關廠方首展咗RX-Vision Concept，睇個名已經令轉子迷充滿遐想。呢款高性能概念跑車嘅設計靈感，來自1967年發表、廠方首款轉子引擎量產車Cosmo Sport，RX-Vision Concept仲融入咗Kodo魂動設計元素，賣相極盡前衞；至於大家最關心嘅動力部分，暫時只知採用Mazda SkyActiv-R轉子引擎技術，以及前置引擎，後輪驅動布局，其餘資料有待廠方日後揭盅。