跑步熱潮愈嚟愈流行，今時今日嘅跑鞋設計，唔只淨係Sell功能，賣相都變成重要項目，今期上架嘅adidas Supernova Sequence 8，標榜穩定性之餘，仲大玩鮮色設計，好似男裝有螢光黃，女裝就主打粉紅色，令各位跑友唔只跑得穩，仲要跑得型，自然成為一大助力，鼓勵大家多啲練跑咪偷懶。

Supernova Sequence 8（M）
$999/對

Supernova Sequence 8（W）　$999/對

鞋底中間嵌入咗Torsion System，藉此協調前、後掌嘅動作，減少足踝扭傷嘅機會。

鞋底內側中間加入Stableframe，加強對腳弓嘅支撐作用。

鞋身兩側嘅三間標誌變成支撐外框，三間之間仲有透氣孔，有助排汗散熱。

鞋面採用Lightweight Seamfree無縫結構，具有輕量化效果。

中底以Boost作為主材料，緩震力強，仲有明顯嘅回彈表現。

Stableframe支撐腳弓

不經不覺，Supernova Sequence嚟到第八代，唔只變型咗，其實功能上嘅改進更加抵讚！Supernova Sequence一向屬於adidas嘅穩定型跑鞋類別，第八代都唔例外，中底用咗接近全掌式嘅Boost物料，其緩震與回彈能力都係adidas嘅最強之選，最特別係內側嘅腳弓位置加設Stableframe，刻意加強對腳弓嘅支撐力，對扁平足嘅跑手而言尤為合適，減少患上筋膜炎嘅機會。除此之外，鞋底中間設有Torsion System，呢塊以Pebax製成嘅組件，具有相當高嘅彈性與韌度，用佢嚟連結前、後掌，用嚟協調着地動作，預防扭傷足踝。至於外底材料係Continental Ultimate Grip，耐磨之餘，仲有出眾嘅抓地力，令跑手嘅每一步都腳踏實地、穩穩陣陣。

無縫鞋面輕巧透氣

鞋身設計方面，同樣以穩定性為大前提，Lightweight Seamfree嘅無縫結構可以減少重量之餘，仲以熱融方式將鞋頭嘅框架與Engineered Mesh連成一體，兼具透氣效果。最妙之處係鞋身兩側嘅三間商標，變成支撐腳掌嘅外框架之餘，而且與鞋尾嘅穩定罩連成一氣，將鎖定作用由腳掌兩側延伸到腳踭，再度加強Supernova Sequence一直標榜嘅穩定性，讓跑手可以放心進行日常練習，為比賽打好根基。

文︰Dick　攝︰Paul

查詢︰2789 8198（旺角豉油街21C adidas Megastore）