Bandai「超合金魂」系列，大大話話已經出咗18年，鐵甲萬能俠、V形電磁俠等人氣款式固然出完又出，不過亦有人氣未必最熱，但製作充滿誠意嘅冷門作品，純屬以貨論貨，質素仲高過唔少熱門Item，當中包括2006年推出嘅《飛越巔峰！》GX-34 Gunbuster。當時唔少玩家都撲個空、買唔到，而B記咁多年嚟都冇復刻再版，終於等到今年先肯頑石點頭，仲係用咗新塗裝嘅「合金Color Version」，巴打們唔使捱炒價後追了！

超合金魂GX-34R《飛越巔峰！》Gunbuster合金Color Ver.
建議零售價：¥22,000

Gunbuster由Buster Machine 1號（右）與Buster Machine 2號組合而成。

腳底伸出針輪，施展終極絕招「Buster超級閃電踢」。

翻起遮住頭部嘅外殼時要小心，慎防刮花頭部尖角。

小腿採用全金屬骨架設計，相當堅固，而且按鍵就可以伸長。

揭開胸甲，唔只見到骨架內構，加插配件後，就可重現劇中扯出核心一幕。

隨盒附有同比例嘅小型訓練機械人RX-7，細細隻都有上色，OK收貨啦！

就連手指指頭都伸出Buster Missile密集飛彈，九年前嘅出品已經咁Detail，要讚！

肩膀內側可以放置斧頭及壘球棒，跟足原著機設。

打開手腳裝甲，就可拉出電擊棒，原著中以此插入敵機，用電壓KO對手。

2006年推出嘅GX-34，主體採用黑、黃雙色。

1988年首播嘅OVA《飛越巔峰！》，係「EVA之父」庵野秀明首次監督嘅動畫作品。

動畫色VS機戰色

相信好多90後從《機戰》認識Gunbuster，淨係知道機體定位介乎真實系與超級系之間，特點係血量厚、招式多，但係睇過《飛越巔峰！》呢套動畫嘅人就少之又少。話說《飛越巔峰！》OVA喺1988年日本首播，係「EVA之父」庵野秀明首次監督嘅動畫作品，製作卡士強勁，由美樹本晴彥擔任角色設定、酒井法子唱主題曲。故事集結咗青春、努力、熱血等Hit爆元素，講述高屋法子與天野和美兩位美少女操作嘅合體機械人Gunbuster，獨力對抗宇宙怪獸嘅故事。今次上架嘅Gunbuster「合金Color Version」，由設計造型以至變形方式都跟2006年嘅初版一模一樣，唯一分別在於本體塗裝由舊版嘅《機戰》配色，即係黑×黃，變成動畫版本嘅金屬藍×黃銅，形象變得更Sharp醒。但要留意今次出貨嘅QC質素參差，筆者嗰盒嘅金屬藍表面就有膠水迹，手腕嘅黃銅色又有少少甩油問題，變形時難免要小心，22,000日圓嘅貨色都搞成咁，B記真係要好好檢討喎！

飛艇二合一

至於變形結構方面，Gunbuster係由兩艘大型飛艇—Buster Machine 1號與2號合體連結而成，前者係頭部、上半身與兩臂，後者就係腰部以至雙腳所在。簡單講，將Buster Machine 1號嘅機頭向兩側打開，就會變成膊頭，再拉出機尾連關節，推向膊頭接駁位就會變成雙手，留意翻起遮住頭部嘅機背外殼時，千祈咪用蠻力，慎防刮花頭部嘅尖角。至於變成雙腳嘅Buster Machine 2號，變形過程相對簡單，只要小心由機頭變成腳掌時，唔好刮花腳尖，以及整斷腳底嘅槓桿，想安心嘅話，大可直接更換造型優先嘅附加腳掌，一石二鳥。

原著精彩重溫：https://www.youtube.com/watch?v=DPWvUyvkW_M

查詢：2433 1828

文：Alfred　攝：Homan