秋高氣爽，又係行山好時節，不過若然閣下係行山初哥，是否既怕迷路又不知哪裏有好風景呢？好在，Google剛剛把街景地圖服務全面擴展至行山熱點，規劃到路線之餘，仲為大家帶來沿途360度美景，睇啱先去，真方便！今次小記獨家直擊街景背包（Trekker）操作員如何攀山涉水，單係器材就重達18公斤，辛苦晒！

球狀裝置內置15組鏡頭，各有500萬像素。

背包離頭頂有60cm高，步行時要重心傾前，對腰力負擔極重，偏偏Raf獨個兒孭住影遍全港山徑。

Google街景有助大家規劃路線，但暫時只供在線使用，建議配合埋實體地圖。

如街景一樣，途人臉孔會被「打格」，藉此保障私隱，所以就算野生捕獲發哥都睇唔到！

若路徑上方設圓形標示，就表示可把人仔放於此，再開啟全景服務。

山景圖夠Wide，障礙物少，比街景圖壯麗有氣勢得多。

相片合成後像素高達7,500萬，就算放大聞相，樹葉也清晰可見。

只要設定好行山的起點和終點，Google Maps自會提供最佳路線，並附上沿路Checkpoint及預計步行時間。

Raf本身熱愛行山，孭着重甸甸的背包，也笑稱是寓工作於娛樂。

事前準備

涉獵熱門郊遊徑

Google街景服務相信大家都用過，以往係拍攝馬路兩旁為主，依靠街景車及街景三輪車就足夠，但一些要徒步到達的位置卻拍不到；因此Google自去年起引入街景背包作「補完」，特派操作員走遍行山熱點、遠足徑、水塘及離島，為大家影遍香港自然瑰寶。經過年多搜集，涉獵範圍已遠至蒲台島、塔門、麥理浩徑及衞奕信徑，以及釣魚翁郊遊徑、大灘郊遊徑、龍門郊遊徑、馬屎洲自然教育徑、馬鞍山郊遊徑、八仙嶺自然教育徑、大帽山遠足研習徑等等，基本上已涵蓋本地熱門郊遊景點。

背包如巨型珍寶珠

目前香港只得一個「背包男」Raf，小記今次隨他到麥理浩徑拍攝，初次見面已被其「行裝」嚇親，因為街景背包與其說是背囊，不如說是巨型「珍寶珠」！上方是一個連接着15組不同角度鏡頭的球狀裝置，下方則是電箱、防潮劑、電線等裝置，整個總長120cm，重達18kg。小記試孭一刻幾乎失去平衡，孭上半小時更感到條腰快要斷，而且途中又要踎低避樹枝，辛苦到爆，很難想像Raf每次背着它數小時，共走遍香港七成郊遊徑，佩服！

7,500萬像素全景相

背包超重，但操作卻很簡單，Raf指背包與Android系統兼容，連接至智能手機再啟動GPS功能即可，途中每個鏡頭會每2.5秒影一次，各有500萬像素，最後再結合成7,500萬像素的360度全景相片。小記用電腦測試，發覺山景圖比街景相更清晰開揚，而且分岔路較少，容易找到正確路徑。至於其他操作則大同小異，例如左右捽移動方向，按箭號向前走，按「＋/－」符號放大縮小等。惟天有不測之風雲，拍攝效果容易受天氣影響，例如天陰、落雨也會如實反映，但考慮到行山也會撞着壞天氣，仲像真啦！

文︰Gilbert　

攝︰Man