HTC One M9+相機升級版小改增攝力

相機攝力可以話係目前揀手機最緊要一環，影相夠靚夠Sharp自然加分。HTC啱啱就推出One M9+相機升級版，強化原有旗艦作One M9+嘅相機部分，加入雙對焦系統以及引進光學防手震技術，令對焦速度同埋手持拍攝穩定性都勁咗！

M9+相機升級版備有5.2吋2K質素屏幕，顯示細緻；並內置Android 5.0.2作業系統以及HTC Sense 7.0介面，操作流暢。$4,998

整體設計與M9+相同，唯一不同係上鏡頭換成Laser AF模組。

搭載指紋辨識器，可以用指紋代替密碼於支付寶付款。

新增「RAW相機」模式，後製相片更見靈活。

試相：影人像細節位清晰，測光、白平衡亦準確。

HTC One E9 Dual SIM採用塑膠外殼，有銀白及灰黑色選擇。$2,998

對焦比上代快

單睇外觀，相信未必可以搵到M9+同M9+相機升級版有乜分別，皆因兩者體積一樣，機身設計都係一體成型雙色調鋁合金，亦有銀金、灰黑兩款色水；唯一唔同就係上鏡頭換咗做Laser AF模組，而呢個正係新機最重要嘅賣點。主鏡頭換上藍寶石鏡面，由原來2,000萬像素提升至2,100萬像素，而且備有全新Laser AF、PDAF雙對焦系統，廠方表示手機會因應環境選擇唔同系統，令對焦速度保持爽快。即場同舊機齊齊試拍，室內光源充足下，發現新機對焦速度快大約0.5秒至1秒，測光亦都比上代準確，「升呢」效果顯著。

手震機會大減

M9+相機升級版同時新增第二代光學防手震技術，手持拍攝時可令手震機會大減，夜拍或者於低光場合拍攝時就最有用。此外，M9+相機升級版仲增設「RAW相機」模式，拍攝時可以即時調校白平衡、ISO、快門等設定，手機將會同時儲存JPG及DNG檔案，專業級用家後製更方便。至於其他功能，就有5.2吋2K屏幕、BoomSound雙前置喇叭、指紋辨識器，又支援中港3G、4G網絡，上代功能統統有齊。順帶一提，舊版M9+即將停售，之後就會由M9+相機升級版取代，出機前記住睇清楚呀！