今期體育界，以至波鞋界嘅一大盛事，當然係「籃球之神」Michael Jordan到訪香港與上海，慶祝Air Jordan 30周年，奇就奇在大家等咗好耐嘅AJ XXX都仲未現身，唔通AJ控嘅銀包可以逃過一劫？朋友你太天真了，事關充滿致敬意義嘅AJ 1 Retro "UNC"，終於開售有期，仲要係先登記、後抽籤，大家又要求神拜佛抽得中了！

AJ 1 Retro High OG Power Blue UNC $1,249
銷售方法︰先於本月20至21日到指定網站登記，抽籤過後，中籤者將獲通知於24日選購。

鞋領採用原始標誌而非Jumpman Logo，鞋尾亦保持光滑原貌，順眼得多。

就與今年5月嘅AJ 1 Retro OG Bulls一樣，UNC嘅鞋舌都用咗「Nike Air」，並冇惡搞變成Jumpman，放心晒！

與原祖AJ 1一樣，UNC 嘅鞋面採用真皮製成，就連質感都令人想當年。

唔只喺NBA，早喺NCAA年代，Jordan已經愛伸脷。

由左至右，喺座談會上，Tinker Hatfield、Michael Jordan與Ahmad Rashad妙語連珠，Tinker Hatfield仲踢爆第一個公開着住AJ 11嘅人唔係Jordan，而係當時做緊電視訪問嘅Ahmad Rashad，比起正式推出早咗三、四個月。

除了Michael Jordan（左三），Jordan Brand的其他球星，包括Blake Griffin（左一）、Chris Paul（左二）、Michael Kidd-Gilchrist（右二）與Cody Zeller（右一）都隨團嚟到上海訪問。

Jordan Brand喺上海特設虛擬遊戲，由LED屏幕搭建出籃球場嘅環境，球迷置身其中，就可Jordan上身，重演佢喺1982年嘅「The First Shot」，或者1998年「The Last Shot」等歷史性時刻。

回到校園時

The Shot、The Move、The Last Shot……「籃神」Jordan喺NBA施展過無數神迹，相信大家都耳熟能詳，毋須呃字數贅述了，其實Jordan嘅威風，早喺大學時代已經爆發，當時佢代表University of North Carolina（UNC）打NCAA比賽，三季合共攞到1,788分，當中包括1982年嘅決賽，面對由Patrick Ewing帶領嘅Georgetown投下致勝嘅絕殺球，種種豐功偉績，唔只令Jordan提前一年離校，參加1984年嘅NBA選秀，亦都進一步鞏固UNC喺NCAA嘅強者地位。

正因如此，當Jordan開始佢嘅NBA征途，AJ亦隨之面世之後，唔只代表Chicago Bulls主客嘅白×紅與黑×紅，多代嘅AJ都會加入白×藍嘅配色，成為向母校致敬、緬懷Jordan喺NCAA年代嘅「UNC」配色。今期登場嘅AJ 1 Retro "UNC"，賣點唔只喺配色上，而且還原程度相當高；曾幾何時，個別嘅AJ 1復刻版本竟然用AJ 3先出現嘅Jumpman Logo，取代原有嘅AJ標誌，今次AJ 1 Retro "UNC"就冇犯呢個錯誤，而且鞋尾保持光滑冇花紋，而鞋舌亦用番「Nike Air」嘅字樣，完整重現AJ 1嘅本來面目。可惜嘅係，呢款AJ 1 Retro "UNC"嘅輸港數量極少，故此未能做到「皆大歡喜」，有心人要先喺本月20或21日先上網登記，抽籤過後，就會喺24日開售，祝君好運！

精華節錄 神與神之對談

早前Jordan Brand喺上海舉辦咗形形色色嘅AJ 30周年慶祝活動，最有震撼力嘅，當然係神與神嘅交會—「籃神」Jordan與「鞋神」Tinker Hatfield嘅面談，仲有知名體育節目評論員Ahmad Rashad擔任主持，大講AJ嘅過去與未來，身為AJ忠粉者，點可以唔知！

Ahmad Rashad︰Michael，你對自己嘅球鞋有咩要求？Tinker，你係點樣幫呢位強人設計球鞋？

Tinker Hatfield：我只記得我哋專門幫佢加固對鞋，因為佢會唔停同我講，對球鞋又爛咗，有時候半場就要換一對新嘅。其實佢改變咗大家設計球鞋嘅慣用方式，因為佢嘅球鞋喺運動中會承受太多壓力，因此了解到佢係非一般嘅球員，亦都逐漸學識點樣處理其他球員嘅情况。

Michael Jordan：我諗我哋成為好搭檔嘅其中一個原因，係我可以同佢講好多提升球鞋性能嘅見解。因為我喺突破以及做其他動作時，力量都會很強，所以當我做完球鞋測試之後，都會將箇中感受、建議話番畀Tinker知，例如你應該喺邊度加固，邊度又可以再作改進……我同Nike簽約之前，我從來冇着過Nike嘅鞋，所以我需要讓佢哋了解我嘅需求，而呢啲需求從來冇變，我需要球鞋有出色嘅貼地感、外形修長、夠輕、夠靈敏，仲要有突出嘅變向抓地能力，30年過去，呢啲要求一直冇變過。

Ahmad Rashad：其實Air Jordan對你哋嚟講，意味咗甚麼？

Michael Jordan：呢個品牌表達咗一個運動員試圖通過唔同嘅方式，影響佢熱愛嘅運動，通過唔同嘅產品增加佢嘅天賦。轉眼已經30年，與第一日相比，Air Jordan已經有好大嘅進步及發展……從創新層面嚟講，我唔知道30年後AJ會去到點嘅境界，但係一定會比依家更加好。我哋一直希望我哋嘅產品可以做到，今日嘅球鞋永遠比昨日嘅好，但係比唔上明日咁好。

Tinker Hatfield：Michael領導佢嘅球隊，令所有人變得更好，因此贏到六次總冠軍，其實佢仲領導一個更大嘅團隊，喺商業與設計嘅世界中獲得冠軍，我哋正係團隊中嘅一員，雖然呢個團隊更加複雜，但係運作模式都係一樣，我們都會共同努力落去。

文︰Dick　

攝︰Ben

網址︰www.nikestore.com.hk