上個月Robot魂出咗自由高達（Freedom Gundam），作為雙胞胎嘅正義高達（Justice Gundam）還會遠嗎？果然今個月就接棒上場。雖然兩者都係主角機，不過設計哲學完全唔同，自由高達最叻遠距離屈機開炮，正義高達就拍住變化多多嘅Fatum-00攻擊飛行載具，擅長高速突入打埋身戰，以上嘅機設特色，Robot魂能否忠實還原？

Robot魂正義高達 建議零售價︰¥6,000

正如動畫中嘅終極一戰，Robot魂嘅正義高達可以同Fatum-00分離，單靠主體出戰。

除咗Fatum-00，隨盒仲有雷射槍與雷射劍，而充當背包嘅Fatum-00就有多段變化。

Fatum-00跟足動畫機設，可以獨立分體，又可以變成正義高達嘅飛行載具。

睇睇臉側嘅炮口及灰色位置，上色到分件都清清楚楚，要Like！

明明肩甲可以拆出嚟變做光束回力鏢，但係隨盒冇咗刀刃Parts，講唔通喎！

Fatum-00多重攻擊

正義高達嘅最強武器，就係充當飛行背包嘅Fatum-00，平常狀態下，Fatum-00會垂直摺埋，想高速突入時，整個背包就會變成水平狀，Robot魂版本跟到足之餘，兩邊嘅翼身亦可作多角度調校。Fatum-00最出位之處，係可以與正義高達分體，變成獨立飛行器之餘，亦可以充當載具用途，畀正義高達企喺上面，實施多元化攻擊，好似孫悟空企喺觔斗雲一樣；Robot魂嘅Fatum-00唔只識分體，仲可以換件形式拉長機身，表面又有榫位與正義高達嘅腳板連接，企得穩穩陣陣。

頭雕冇得輸

Fatum-00設計交足貨，身為主體嘅正義高達又如何？論可動性，真係幾難挑剔，手肘、膝頭都有雙關節，膊頭又有伸展式設計，胸腰之間又可大幅度拗動，真係要雞蛋裏挑骨頭嘅話，就係腰側外甲以Ball Joint連接，可動性係高，不過比較易甩，好彩裝番上去都唔算難。至於雕工方面真係要讚，尤其是頭部，之前嘅自由高達已經有好高水準，至於布局更複雜嘅正義高達，Robot魂都冇走樣，例如兩邊臉頰嘅MMI-GAU1近接防禦機炮，仲有白色面罩兩旁嘅灰色裝甲，由分件到上色都做到清楚準確。至於自由高達已經欠缺嘅滲線，正義高達都出現同一毛病，抵鬧；明明肩甲可以分拆出嚟變成RQM51光束回力鏢，隨盒竟然冇咗作為刀刃嘅特效組件，更加抵鬧！到底Bandai想收埋出「魂Shop」網購組件賺多筆，定係留喺明年1月推出嘅天帝高達（Providence Gundam）做Bonus Parts？

查詢︰2433 1828（瑞華行）

文︰Dick　

攝︰Man