如果你係80後,相信放學後返屋企,一定睇過《功夫貓黨》、《肥牛牛布斯》等擬人化嘅卡通;回想80年代,真係Hit過唔少以動物做主角嘅動畫,當中仲有1984年於日本首播、宮崎駿都做過頭六集導演嘅《名偵探福爾摩斯》,劇中所有人物都由唔同品種嘅狗隻飾演,例如好拍檔華生係史納沙,主角福爾摩斯就係獵犬。除了《艦隊Collection》、《進擊之巨人》及《The Avengers》等等新興題材外,figma也向集體回憶出發,宣布將於明年5月推出福爾摩斯,造型跟足當年人設,着上獵鹿帽及乾濕褸,披肩部分仲用咗軟膠製成,以免阻礙雙手擺動,加上煙斗、放大鏡及手槍等小道具,完全入型入格。就如同廠嘅其他Figure般,呢款福爾摩斯都有多組活動關節,就連雙眼都有可動設計,傳神重現神探思考奇案時嘅沉思表情。更大驚喜是除了Figure主體,隨盒仲會跟埋福爾摩斯嘅老爺車,做工講究,平心而論,有人又有車,建議零售價¥8,800,實在唔算貴。

figma《名偵探福爾摩斯》福爾摩斯
建議零售價:¥8,800
(2016年5月推出)

放大鏡及手槍等標誌性嘅道具,隨盒統統有齊。

最大件、最令人期待嘅Parts,當然係福爾摩斯嘅老爺車。

文︰Dick(圖片來自www.figma.jp/ja/figma)